ORANJESTAD (AAN): Ultimo tempo por a nota un aumento substancial di personanan cu ta usando e boternan chikito di gas di 20 liber debi cu nan ta hopi portatil.
Sea ta pa pone na un Gas Barbecue Grill, of ta pone como fuente principal pa un stoof na cas. Pero tambe tin hende ta pone direct na dryer di paña, y waterheater.
E ta un secreto publico cu hopi hende cu no tin un sistema gekeur di instalacion di gas na nan cas of apartamento, ta haci uso di e boternan aki di 20 lbs. Y awor cu na fin di aña tin hopi hende den cushina ta preparando cuminda pa cambio di aña, e posibilidad di accident y otro incidente relaciona cu e uso indebido sea den aire liber of tin hende cu ainda ta pone nan den cas.
Ta conoci cu den pasado, na diferente ocasion tabatin accident cu a socede, cu a envolvi explosionnan cu tabata relaciona cu habitantenan cu ta usa gas. Esey ta pone cu tur hende mester sa e esencial, con pa usa gas na un forma mas sigur y responsable pa evita incidentenan, no djis den temporada di Fin di Aña, sino durante henter aña.
E prome ta pa compronde con gas ta comporta su mes y con pa maneha esaki. Y aki tin algun tip pa bo haci uso mas safe di e substancia aki ora di prepara cuminda na bo cas.
(1) Si bo ta cansa of bao influencia di alcohol, no bay cende of traha cu un stoof di gas of cualkier aparato electrico cu ta depende di gas.
(2) Si bo ta un adulto di edad grandi cu ta biba bo so den cas of apartamento, bo mester conta cu supervision pa minimalisa e riesgo di accident ora di usa aparatonan cu ta usa gas.
(3) Prome bo tin di cende e swafel of lighter prome, y despues habri e konopi/valve di gas. Si bo haci esaki net reverse, bo por pone mas cantidad di gas sali, loke lo aumenta e riesgo di un accident of explosion.
(4) Semper bo mester pone boternan di gas pafo di bo cas of apartamento, no menos cu 1½ meter di porta of bentana pa minimalisa e chens cu e gas por plama y bay paden di bo cas, apartamento, of negoshi den caso cu tin un lek.
(5) Si diripiente den bo cas of negoshi bo ta haya holor fuerte di gas, bo tin di core sali di e propiedad, y yama Cuerpo di Bombero na 911 pa alerta nan.
