Ministro a reuni cu Elise Maduro cu su plataforma digital pa yuda cu cuido na adultonan mayor na cas

ORANJESTAD (AAN): Manera ta conoci, recien e dama Elise Maduro a gana prome luga cu su compania startup “Eden Embrace” na e asina yama O’STAD200 Incubator Pitch Event organisa pa Impact Hub.

   Elise Maduro a presenta su startup Eden Embrace pa Ministerio di Adulto Mayor. Eden Embrace ta un iniciativa dedica na mehora e calidad di bida di nos adulto mayor mientras ta duna paz mental na nan cuidadonan. E programa ta enfoka riba yena un espacio importante den e sistema di cuido, specificamente pa esnan cu kier keda na su propio cas mas largo, pero cu mester di un nivel adicional di apoyo pa logra esaki.

   Eden Embrace lo ta un plataforma digital unda cu personanan por haci un peticion pa cuido adicional pa adulto mayor na cas. Na e otro banda, studiante y profesionalnan den sector di cuido por aplica pa traha abase di e peticionan cu tin disponibel. Lo ofrece diferente servicio, manera bishitanan basico, cuido di anochi, y servicio di 24 ora te 48 ora. Tambe, lo presenta articulonan educativo via e plataforma digital, cu ta intenciona pa informa tanto studiante como profesional den e sector di cuido.

   E programa ta contribui directamente na e mehoracion di nos comunidad, pasobra ta yuda alivia e carga di mantelzorgers y duna apoyo y guia necesario. E servicio ta un paso importante pa nos adultonan mayor por keda biba den un ambiente familiar, mientras cu nan ta ricibi cuido profesional y adapta na nan necesidadnan personal.

   Ministerio di Adulto Mayor ta felicita Elise Maduro cu su prome luga den competencia di O’STAD200 Incubator. Tambe ta desea Elise Maduro tur exito cu su startup Eden Embrace, cu lo crea un impacto positivo y sostenibel den e sector di cuido di adulto mayor.