Directie Natuur en Milieu:
ORANJESTAD (AAN): E falki (Buteo albicaudatus), na Ingles conoci pa White-tailed Hawk, ta un sorto di parha cu ta hay’e den area tropical of sub-tropical di e continente completo di America. E sorto aki a yega di broei na Aruba pero awo e ta un bishitante scars. Leu a leu cu amantenan di parha ta wak’e ta un sorpresa agradabel.
E parha por bira casi 60 centimeter largo y por tin un ‘wingspan’ di 1.2 meter. E parha ta pisa entre 880 y 1240 gram. E falkinan adulto tin un tono mas shinishi y cu plumashi blanco na su bariga. E tin un rabo cortico blanco cu un strepi fini na e punta color preto. E parti aki ta mas bisto ora e ta den vuelo. Bou di su halanan ta mas blanco cu pinta pinta color bruin. E falki ora e ta mas jong e ta mas scur tin ora por parse hasta preto.
E iris di su wowo ta bruin, e parti cu ta conecta cu su piek preto ta color berde sushi. Su pianan ta geel y cu su garnan y huña skerpi ta preto. E falki tin un yamada skerpi cu parecido na un grito di cabrito. Nan cuminda ta varia dependiendo di nan ubicacion. Nan ta come coneu, lagadishi, raton, colebra, dori, tiracochi, parha chikito manera patrishi y hasta bestianan morto.
Nan neishi ta traha di takinan di mata robusto manera hubada, nan ta traha esakinan na un haltura di riba 15 meter for di suelo. Falki no ta bandona nan neishi, nan ta keda uz’e aña tras aña.
E falki ta pone mas tanto 2 webo, nan ta blanco cu poco piek piek bruin cla of color lila. Perdida di habitad, uzo di pesticida pa mata animalnan indesea, desaroyo den exceso, especie invasivo, fragmentacion di tera, parasito di cria y contaminacion ta e motibonan principal di desaparicion di especie di nos tera y paisahe.
