Ministro a desea grupo di acrobacia RCC Aruba hopi exito na Circus Festival na Hungria

ORANJESTAD (AAN): E grupo di acrobacia Ritmo Cubano Company, conoci como “RCC Aruba” ta participando den Budapest Circus Festival,

un competencia internacional di circo na Hungria, representando Pais Aruba.

   E festival di circo internacional aki, ta den e top tres festivalnan di circo mundialmente. E huradonan ta consisti di doñonan den e industria di circo mas renombra internacionalmente, manera entre otro Cirque du Soleil. Na Budapest Circus Festival ta participando circo di 29 diferente pais y RCC Aruba ta representa Pais Aruba. 

    Prome cu e competencia internacional, RCC Aruba a participa durante lunanan di October y December 2021 den un Tour na Budapest, dunando presentacion tur dia y alavez promoviendo Pais Aruba.

   RCC Aruba ta consisti di sr. Diego Emilio Garzon Sierra, sr. Juan Camilo Aguillon, sr. Jhon Freddys Badillo, sr. Juan Felipe Marin Rios y directornan sr. Diego Jaramillo Ospina y señora Yamila Hernandez Ramirez.

   Minister Xiomara ta desea e Grupo di Acrobacia RCC Aruba na nomber di Gobierno y comunidad di Aruba, hopi exito na e Budapest Cirucs Festival y ta gradici nan pa e tremendo trabao cu nan ta haciendo pa promove Pais Aruba den tur nan presentacionan.