KINGSTON: Informacion nobo cu e cuerpo di Jamaica Constabulary Force (JCF) a duna e siman aki, ta cu 37 asesinato a wordo cometi den e prome siman di 2022 na e isla.
Esaki ta un aumento di 32.1 porciento compara cu aña pasa. Na 2021 den e prome siman di aña, tabatin 28 asesinato.
Segun JCF a indica, di 1 di Januari te cu 8 Januari 2022, tabatin siete asesinato cometi den parokia St. Catherine North, seis na Westmoreland, cuatro den Kingston central, y tres na St. James y St. Ann.
Kingston eastern, Kingston western, St. Andrew central, St. Catherine south, Manchester, y St. Thomas tin dos asesinato cada uno, mientras cu St. Elizabeth y Hanover tin 1 asesinato cada uno.
Debi na esaki, den fin di siman Gobierno a declara un “Zona di Operacion Special” den e seccion di Parade Gardens di Kingston central, unda nan ta trata di reduci e tension creciente y asesinato cu ta sigui tuma lugar den e area.
Tirando bista riba statistica di aña pasa, di 1 Januari 2021 te cu 25 December 2021, un total di 1.439 Jamaiquino a wordo mata.
