AMSTERDAM: E instancia di Fiscale Inlichtingen- en Opsporingsdienst (FIOD) di Hulanda, a detene un Hulandes di 58 aña di edad na Aeropuerto di Schiphol, bao sospecho di labamento di placa.
E homber tabata cla pa viaha pa Suriname, y tabatin 160.000 euro cash den su poder.
Un cacho special di Douane a detecta esaki durante un control regular di maleta. El a sconde 155.000 euro den su maleta cu el a check-in, y a pone 8.000 euro mas den su maleta di man. E placa a wordo haya scondi den saconan di carson di jeansnan exclusivo y hopi caro, segun FIOD a laga sa.
Ademas den su poder a haya dos holoshi exclusivo mas, varios prenda, un paspoort falso, cedula, y ocho smartphone, di cual 5 ta nobo.
For di prome investigacion haci door di FIOD, a sali na cla cu e homber no por a duna declaracion pakico e tin asina hopi placa den su poder. Pesey e ta deteni awor riba sospecho di labamento di placa, y cu e no a declara cu e tabatin mas di 10.000 euro den su poder na Douane.
Debi cu FIOD a cuminza sospecha cu e homber aki na su cas lo por tin mas placa scondi, nan a core tene un razzia den e cas di e homber. Durante e razzia aki, nan a confisca un auto, varios paña caro y exclusivo, varios portable Hard Disk Drive, y tambe caha yen di documento.
