Ministro a bishita Cacique Macuarima School riba nan prome dia

ORANJESTAD (AAN); Diahuebs mainta, Minister Endy Croes a continua cu su bishita na diferente scol rond di Aruba en conexion cu e prome dia di aña escolar 2023-2024.

   Na e ocasion special aki, Minister Endy Croes a bishita scol basico Cacique Macuarima unda e dignatario a ricibi cu un caluroso bonbini pa cabesante di scol Señora Rachelle Croes-Caster y alumnonan di klas 6 A y 6 B. Durante e bishita Minister Endy Croes tabatin e oportunidad pa hiba palabra y a motiva e alumnonan pa haci nan maximo esfuerso na scol.

   Ta nan ultimo aña na scol basico pa despues continua cu nan enseñansa secundario. Enseñansa ta hopi importante pa e desaroyo profesional y personal di nos hobennan. Enseñansa ta e yabi pa forma ciudadano competente den nos comunidad y asina hunto yuda contribui na e progreso di Aruba.

   Ademas di esaki, Minister Endy Croes ta desea tur maestro hopi pasenshi, forsa, amor y sabiduria pa e aña escolar nobo pa hunto nos logra e deseo pa educa nos muchanan na un miho forma. Señora Croes-Caster a indica cu e dia a cuminsa hopi bon cu yen di alegria y entusiasmo.

   Alavez Señora Croes-Caster ta desea tur alumno y colega den veld di enseñansa un exitoso aña escolar 2023-2024. Por ultimo, Minister Endy Croes ta gradici cabesante Señora Rachelle Croes-Caster, Señora Karin Berkemeyer di klas 6 A, Señora Jasmin Kelly di klas B y alumnonan pa e caluroso recepcion. Exito e aña escolar aki