Minister Maduro di Finansa a bira e prome mandatario Arubiano pa traha un moneda conmemorativo na e isla

Banco Central a introduci moneda special '100th Anniversary Aruba Aviation 1923-2023'

ORANJESTAD (AAN): Aruba a conoce e mundo di aviacion pa prome biaha riba dia 18 di augustus 1923 ora dos avion Mericano tipo 'hydroplane' rumbo pa Curaçao, a aterisa na Paardenbaai pa haci reparacion.

   Aviacion na Aruba a percura pa conecta nos cu mundo y na aña 1934 e prome buelonan comercial a cuminsa entre Aruba y Curaçao y poco poco e conexion cu mas Pais a bira posibel, locual a yuda nos desaroya Aruba den un Pais na unda e industria di turismo por a florece. Mirando e importancia di aviacion pa Aruba y pa conmemora e di 100 aniversario di aviacion na Aruba, Aruba Airport Authority y Banco Central di Aruba a prepara un moneda special pa asina conmemora e acontesimento unico aki den e historia di nos Pais.

   Hunto cu Koninklijke Nederlandse Munt NV a diseña e moneda cu na un banda ta ilustra e yegada 100 aña pasa di e prome avionnan na Paardenbaai, y na otro banda tin e Escudo di Aruba. Na e rand tin poni 'Dios ta cu nos.' E moneda tin un denominacion di 5 Florin y ta obtenibel na Banco Central.

   Pa haci e celebracion mas special, a scohe pa e moneda conmemorativo worde traha na Aruba mes durante e festividad pa celebra e di 100 aniversario di aviacion na e Aeropuerto di Dakota. Na Minister di Finansa, Xiomara Maduro, a toca e honor como e prome dignatario Arubiano pa traha e moneda conmemorativo na Aruba mes durante e festividad.

   Den presencia di Ministernan Dangui Oduber y Ursell Arends, President di Banco Central Jane Semereel, Director di Aruba Airport Authority Joost Meijs, Director suplente di Departamento di Aviacion Anthony Kirchner y ehecutivonan di Koninklijke Nederlandse Munt NV Bert van Ravenswaaij y Danielle Ranzijn, Minister Maduro a bati e mokel riba un aparato di metal pa asina por a crea e moneda pa conmemora 100 aña di aviacion na Aruba.

   E unico biaha cu un moneda a worde traha na Aruba, esaki a worde haci pa Reina Beatrix, y awo e di dos biaha cu ta traha un moneda na Aruba, a toca Minister Maduro e honor pa como un dignatario Arubiano pa haci esaki. E mandatario ta gradici Banco Central y Aruba Airport Authority pa e bunita moneda pa recorda e acto historico aki di nos Pais, y ta gradici nan pa e honor di por ta e prome Arubiano pa traha un moneda na Aruba.