Fin di September caba St. Aloysius School lo muda pa nan scol renoba

ORANJESTAD (AAN): E ta kedando cla! Minister di Enseñansa y Deporte Sr. Endy Croes a confirma na DIARIO cu e scol St. Aloysius School na Noord lo  muda final di luna di september pa asina nan por ta den nan propio edificio ful renoba.

   Desde aña pasa a inicia e proyecto di renobacion di Sint Aloysius School na noord. Ta un secreto publico cu desde varios aña gobierno ta huur VAD gebouw pa asina aloca varios scolnan, entre otro, Sint Aloysius School. Esaki e Minister encarga actual cu enseñansa a hereda for di ex Minister Lampe. Ex Minister Lampe di partido RED a hiba un politica di pleitamento cu henter e veld di enseñansa, basha edificio abou di, entre otro, Colegio Frère Bonifacius, a laga Sint Aloysius School na werki y bandona y asina tin varios ehempel mas.

   Mientrastanto, e vision di e Minister actual ta traha hunto, scucha y trece trankilidad, inclui participacion di henter e veld di enseñansa, traha di cerca cu tur departamento di enseñansa y nos profesionalnan. Lora manga di camisa pa por pone accion tras di palabra pa por realisa cambionan grandi y necesario den enseñansa.

   St. Aloysius School tabata un di e ehempelnan di un scol bandona. Alumnonan mester sea tuma un bus of mayornan mester hiba alumnonan di noord pa playa den un edificio cu no a worde construi pa ta un scol. Pues Minister Endy Croes manera cu el a tuma e encargo over na september 2021 mesora a reuni cu SKOA pa asina scucha e necesidadnan y traha riba un plan.

   St. Aloysius School tabata halto riba agenda pa por a renoba e scol aki por completo. Ex Minister Lampe kier a basha e scol aki tambe abou y pone modulair (trailer) riba e tereno. SKOA kier mantene e estilo y conserva e edificio cu ta di gran balor. Pues mesora a pone accion tras di e promesa y palabra. A traha riba e plan y e costonan di e proyecto.

   Via di un Decreto Ministerial a aloca 2 miyon Florin cual a worde traspasa pa SKOA. Asina SKOA por a cera e contractonan necesario cu contratistanan cu SKOA a eligi pa por realisa e proyecto aki. E scol nunca tabatin un gymzaal y a percura pa inclui un gymzaal den e proyecto. Despues di 1  aña y dos luna di trabaonan duro ta yegando e fase final pa e proyecto por worde entrega.

   Asfalt pa e speelplaats: E ultimo parti di e proyecto ta asfalt pa e speelplaats. Manera ta conoci, na momento awa yobe e speelplaats aki tabata bira un pool. Pues DOW mester a traha ful un plan pa nivela e haltura y saca e awa banda di pariba y conecta esaki riba un rooi existente pa por drecha e parti aki cual tabata duna hopi problema.

   Awe Dialuna 21 di augustus DOW lo inicia cu e trabaonan aki. Lo ranca e asfalt existente pa despues egalisa e fundeshi. Lo pone “betonband” di 30 cm largo y 15 cm hancho den e fase di preparacion. E siman di 7 y 8 di september e asfalt nobo lo worde basha por completo pa asina termina e trabao. Lo dura 3 dia pa esaki mara y seca bon. Desde 11 di september por cuminsa trafica riba e asfalt aki den fase di preparacion pa cu e mudamento.  

   Lo muda e siman di 20 di september: SKOA a manda un carta di notificacion pa Minister di Enseñansa cu e siman di 20-28 di september nan ta prepara pa e mudamento tuma luga. Mientras DOW ta atende cu e asfalt den mesun dianan aki e contratista ta termina e trabaonan chikito. Asina ta coordinando tur cos pa e mudamento tuma luga di acuerdo cu e plan.

   Minister Endy Croes ta termina gradiciendo tur “stakeholders” cu a haci esaki posibel. Alavez ta gradici cabesante, docente-, mayor- y alumnonan di Sint Aloysius pa nan pasenshi. Momento bo uni, scucha, pone un vision cla cu bo curason na e luga corecto bo ta logra cosnan grandi. Minister Endy Croes ta transforma palabra y promesa den hecho y esaki ta muestra di uno di nan. Pabien noord! Pabien Sint Aloysius School.