Ministerio di Transporte a organisa un sesion informativo pa taxistanan nobo

ORANJESTAD (AAN): Diahuebs ultimo Minister demisionario Ursell Arends a acerca departamentonan y organisacionnan relevante pa tene un sesion informativo pa taxistanan nobo.

   Un sesion den cuadro di esfuersonan pa duna guia, conocemento y herment necesario pa opera manera debe ser, manera un entrepreneur responsabel. Durante e sesion, representante nan di Departamento di Transporte Publico, Aruba Certification Program, Aruba Conservation Foundation, RBC y Ministerio di Transporte a comparti informacion riba temanan importante cu taxistanan mester ta consciente di dje. 

Tema nan cu a wordo presenta ta entre otro;

• e demanda pa servicio di taxi den oranan di anochi,
• e responsabilidad pa cumpli cu impuesto,
• participacion den e Aruba Certification Program,
• vestuario,
• maneho y ley actual,
• posibilidad pa regla pensioen cu PFTSA. 

Un sesion informativo fructifero unda ta prepara e taxistanan pa nan opera debidamente y provee servicio di calidad. Iniciativa cu ta enfoca riba fortalece e sector di taxi como un pilar esencial den nos sistema di transporte turistico via un maneho transparente. Minister Arends ta gradici tur departamento, organisacion y taxistanan pa nan cooperacion pa asisti na e reunion, y pa nan participacion activo.