Rudy Leysner, President di Fundacion Movimento ta Bida:
ORANJESTAD (AAN) Rudy Leysner, President di Fundacion Movimento ta Bida, a duna di conoce den entrevista cu DIARIO, cu el a papia cu Gobierno y cu Parlamento, y nan a haya importante e relato cu Fundacion FMTB traha tambe, cu nan a haya un average di 2.600 persona cu a haya beneficio di e programanan cu e fundacion tin.
“Nos ta creciendo, y cada bez nos ta crece mas, pasobra tin un necesidad pa traha mas programa pa hende grandi, pa mantene e adultonan mayor activo”, Rudy Leysner a splica.
El a menciona cu nan tin cu parti e gruponan segun edad, pasobra ora nan yega edad di 60 pa 65 aña, hopi di nan ta vital ainda.
“Y bo tin cu mantene nan vital. Bo tin cu preveni pa nan no bira malo. Hopi biaha ora nan baha cu pension nan ta bisa cu nan ta bay descansa. Pero e ora ey bo tin e libertad di haci loke bo gusta pa haci, anto keda activo. No bay cera bo mes na cas, lesa corant of wak television. No! Mantene bo mes activo; mas activo bo mantene bo mes, miho bo calidad di bida ta”, Leysner a indica.
El a agrega cu na Aruba tin mas of menos 23.000 pensionado. Si e fundacion por haya sikiera 50% di e poblacion ey, cu nan lo mantene activo, nan lo yuda hopi. “Pero tambe, nos mester cuminza for di jong. Nos a ripara cu nos lo mester prepara e hendenan grandi pa esnan cu ta bay cu pension tin actividad pa haci despues, cu nan lo no bay cas y nan lo no sa kico pa haci tampoco”, Rudy Leysner a señala.
Leysner a menciona cu Fundacion Movimento ta Bida tin mas of menos 50 boluntario. Tin cinco boluntario pa cada grupo. “Si bo no tin e boluntario, bo no por sigui crece. Boluntario ta hopi importante, pasobra bo tin cu siña e boluntario con pa traha cu hende grandi. Y ta nan a bay tuma over e gruponan. Nan ta bay traha programa pa e gruponan, ta bay scucha ki e grupo kier, y a base di loke nan ta scucha ta bay traha e programa, pero mester di boluntario, si no e trabao aki no por wordo haci”, señor Leysner a remarca.
