Minister Wyatt-Ras mustrando cu diferencianan entre paisnan den Reino no mester obstaculiza cooperacion

Minister Wyatt-Ras mustrando cu diferencianan entre paisnan den Reino no mester obstaculiza cooperacion

Vierlandenoverleg riba cuido a cuminsa

ORANJESTAD(AAN): Diahuebs mainta a tuma lugar apertura di e asina yama Vierlandenoverleg entre ministernan di Aruba, Corsow, St. Maarten y Hulanda. Pa e ocasion aki Diputadonan di Bonaire, Saba y St. Eustatius tambe tabata presente.

   E tema di e Vierlandenoverleg e aña aki ta Salubridad Publico.  Minister di Salubridad Publico, Desaroyo Social, Cuido pa Mayornan y Adiccion Mervin Wyatt-Ras a cuminsa na duna un bon bini na tur e representantenan di e diferente paisnan, cu a yega Aruba pa establece un cuadro di cooperacion den Reino Hulandes pa loke ta Salubridad Publico.

   “Ta basta tempo pasa cu nos a bin hunto akinan na Aruba y awor un biaha mas”. Danki cu boso tey y cu boso ta sigui haci esfuersonan pa fortalece e cooperacion  den Salubridad Publico entre nos paisnan, segun Wyatt-Ras.

   El a sigui bisa cu apesar cu e paisnan den Reino ta diferencia den tamaño, geografia y sistema di Salubridad, e paisnan ta confronta cu e mesun tipo di retonan manera enfermedadnan cronico, scarcedad di profesionalnan den cuido y un aumento di casonan medico complica.

   “Pa e paisnan di Reino den Caribe e retonan hopi  biaha ta mas grandi, debi na nos populacion chikito, recursonan limita y ubicacion geografico”.

   Sinembargo nos diferencianan no mester stroba nos cooperacion, sino esakinan ta duna nos e oportunidad di siña for di otro, comparti conocemento y busca solucionnan hunto.

   Mientras cu cada pais tin su propio responsabilidad y prioridadnan, nos ta comparti e compromiso pa brinda e mihor posibel cuido pa e habitantenan di nos paisnan, segun e minister di Salubridad.

Despues cu e mandatarionan di e 4 paisnan di Reino a hiba palabra, nan a firma un documento di cooperacion pa loke ta Salubridad Publico.