Ora di registra na e Cuenta BOi mester yena tur dato corectamente sin ningun fout

Ora di registra na e Cuenta BOi mester yena tur dato corectamente sin ningun fout

Meverly Romano, PR di DIMP:

ORANJESTAD (AAN) Relacionista Publico di Departamento di Impuesto, Meverly Romano, den su entrevista cu DIARIO tocante e Cuenta Online BOi, a amplia e informacion y haci un apelacion na comunidad pa tur persona registra na Inkomstenbelasting crea e account aki, y DIMP ta recomenda fuertemente pa haci’e awe mes.

   “Un cos si, ora di registra yena bo datonan cuidadosamente, tuma bo tempo wak si no tin type fout, wak si bo fecha di nacemento ta bon yena, si bo number di cedula ta bon yena, pasobra si e no ta bon yena, e sistema ta bay manda un mail pa e persona bise cu e tin cu haci un afspraak”, Romano a señala.

   El a agrega cu si e persona no tin number di cedula e por uza e number di un cobranza di inkomstenbelasting, di e ultimo cinco añanan. Pero si e no yena e aanslag number e sistema ta mand’e un e-mail pidie p’e haci un cita, pasobra DIMP tin cu verifica su identidad. Y ora e bin pa su cita e tin cu presenta su rijbewijs of su passport, pa controla su identidad y asina yude crea su cuenta di BOi.

   “Esaki ta un cuenta hopi importante, algo hopi personal, hopi priva. Bo ta bay wak datonan sensitivo, kiermen, nos tin cu sa sigur cu e persona cu ta registra riba e cuenta di BOi ta e persona cu e ta bisa cu ta”, señora Romano a remarca.

   E ta reitera cu e persona cu no ta cumpli cu esaki tampoco por cumpli cu su deber di entrega e declaracion, loke ta bay causa cu despues e ta bay haya un cobranza taxativo cu semper ta sali mas halto pasobra e ta calcula pa inspeccion di impuesto, y esaki semper ta sali cu boet. “Y manera mi a bisa e boet ta cuminza cu 250 Florin y ta bay te 10 mil Florin, depende di e entrada di e persona. Pues, nos kier  haci un apelacion na comunidad pa registra mas lihe posible pa nan por cuminza tambe ser conoci cu e portal, click den tur e foldernan wak kico ta ofrece, y claro si tin pregunta yama DIMP.

   Tur dia nos tin nos hendenan na telefon y nos hendenan cu ta atende cu e email-nan cu ta drenta, nan ta contesta mas lihe cu por, pasobra e volumen di yamada cu nos ta haya ta hopi grandi, y e cantidad di e-mailnan cu nos ta haya tambe ta masha hopi. Pero nos ta purba contesta y keda al dia pa e personanan tin nan contestanan y hasta tin hende ta bin cerca nos, personalmente, locual ta bon pasobra nos sa cu nan ta interesa, kier sa mas, y nos ta yuda nan.