Minister Wever a reuni cu KvK pa impulsa desaroyo y stabilidad economico

ORANJESTAD (AAN):  Diaranson mainta Minister di Finansa, Asunto Economico y Sector Primario,

Geoffrey Wever a reuni cu representantenan di Camara di Comercio (KvK) pa trata temanan importante pa desaroyo economico di nos pais.

            Un di e puntonan riba e agenda tabata e Dutch Caribbean Agriculture, Livestock, and Fisheries Alliance, y den cuadro di esaki e desaroyo di e Agri-Innovation Park. Un iniciativa di Minister Wever pa modernisa y stimula nos sector agricola pa duna stabilidad alimentario y crea oportunidadnan di empleo den e sector agricola.

            Minister Wever tambe a duna un actualisacion di e proximo paso den transformacion di E-Government, cu Minister Gerlien Croes ta implementando. E meta pa yega na un sector publico cu ta menos burocratico, transparente y orienta pa duna e mihor servicio,” Minister Wever a declara.

            Den e reunion a papia tambe di e situacion financiero actual di Aruba, enfatisando riba e reduccion di debe, control di gastonan di personal publico y e plan pa aumenta poder di compra pa e ciudadanonan di Aruba.

            Riba cuestion di regulacion di Vacation Rentals (AirBnB y otro plataformanan), e minister a expresa e necesidad di fair competition, un sistema fiscal cu ta bon pa comunidad y turismo, y regulacion cu ta proteha nos hendenan den tur esaki. Minister Wever a splica cu Gobierno ta trahando riba e maneho integral pa vacation rentals.

            Pa reduci riesgo den e cadena di suministracion global, minister Wever ta trahando pa logra diversificacion di importacion via Colombia, Panama y Surinam, pa aumenta resiliencia economico. “Diversificacion no un ta opcion, e ta algo necesario,” segun minister Wever.

            Adicionalmente, durante e reunion a intercambia di pensamento riba reforma y incentiva fiscal. Otro punto cu a keda adresa ta e necesidad pa formalisa e economia informal.

            E reunion a finalisa cu un compromiso claro: nos reto ta rekeri union, vision y curashi.“Hunto cu nos empresarionan, trahadonan y lidernan den comunidad, nos ta traha pa forma e base pa un Aruba mas fuerte y mas prepara pa futuro,” minister a finalisa bisando.