Cas di Cultura ta apoyando e Exposicion Final di ‘Baila bo (hi)storia’

Vicky Arens

ORANJESTAD (AAN): Pa di dos biaha, e proyecto ‘Baila bo (hi)storia’ lo ta atrobe na Aruba!  E biaha aki e proyecto a ocupa cu dos scol, esta Filomena College MAVO y tambe Abraham de Veerschool MAVO.  E tabata full gratis pa e participantenan.  E proyecto ta uno multi-disciplinario, unda hobennan di edad 12 te 16 aña ta siña kico nan historia ta, di unda nan ta bin, kico ta nan tradicion familiar y cultural.  Asina nan lo colecta esaki como un storia colectivo.

   Nan ta siña den 4 disciplina pa agrega esaki, pues nan ta inclui tur esey den baile, musica, moda, y tambe graba un short-film cu ta bira e producto final.  Tur hende di gruponan ta traha hunto na final pa crea e short-film aki.

   Vicky Arens di Cas di Cultura, a indica cu pa nan ta un gran placer pa traha un biaha mas cu Layzmina Emerencia di e proyecto ‘Baila bo (hi)storia’ y su team.  El a menciona cu Layzmina a bira conoci cu e proyecto anterior di “Memoria Ancestral” cu tabata den cuadro di herencia y sclavitud den aña di celebracion di abolicion.

   Cas di Cultura a keda impresiona cu e ‘Baila bo (hi)storia’ di 2024, unda hobennan a realmente sali di nan casca y traha video cu bailenan hopi expresivo, bunita, y di un otro nivel unda a saca di nan mes tur expresion cu nan tin, liga na e hecho ta ken bo ta, bo historia, y di unda bo ta bini.

   Arens a indica cu na Cas di Cultura nan ta di opinion cu mester enfoca mas den parti di herencia pa hobennan para fuerte den nan zapato, y esaki ta netamente un proyecto cu ta colabora na esey, y pa tal motibo Cas di Cultura a invita nan pa ta nan huesped dia 1 di Juli 2025, y ta invita publico pa bin mira e proyecto aki cu ta liga mas cu hubentud.  Lo cobra un prijs simbolico di 5 Florin pa entrada.

   Diabierna 27 di Juni tin presentacion na plenchi di Filomena College MAVO, for di 8:00 pm te cu 9:30 pm, cu premiere di e shortfilm “Connecting The Dots”.  E ta habri pa publico tambe.

   Diasabra 28 di Juni lo tin na Scol di Arte for di 8:00 pm te cu 9:00 pm e premiere di e shortfilm ‘Celebration”.  Tambe ta habri pa publico.

   Diamars 1 di Juli tin e Exposicion Final na Cas di Cultura for di 7:00 pm te cu 9:00 pm.  E ta habri pa publico cobrando cinco Florin, pero sigura bo asiento via e website aki:

www.bit.ly/hi-storia

   Publico di Aruba ta invita pa bay mira e presentacionnan aki, incluyendo e exposicion final.