Samantha Illidge orguyoso con hobennan a graba nan mesun short-film

Proyecto ‘Baila bo (hi)storia’...

ORANJESTAD (AAN): Pa di dos biaha, e proyecto ‘Baila bo (hi)storia’ lo ta atrobe na Aruba!  E biaha aki e proyecto a ocupa cu dos scol, esta Filomena College MAVO y tambe Abraham de Veerschool MAVO.  E tabata full gratis pa e participantenan.  E proyecto ta uno multi-disciplinario, unda hobennan di edad 12 te 16 aña ta siña kico nan historia ta, di unda nan ta bin, kico ta nan tradicion familiar y cultural.  Asina nan lo colecta esaki como un storia colectivo.

   Nan ta siña den 4 disciplina pa agrega esaki, pues nan ta inclui tur esey den baile, musica, moda, y tambe graba un short-film cu ta bira e producto final.  Tur hende di gruponan ta traha hunto na final pa crea e short-film aki.  Segun Illidge, nan a usa equipo profesional pa traha e peliculanan aki, y aki ta unda hubentud tambe a siña di comienso con pa opera tur cos, con pa cuminza cu un ‘concepto’, cu script, y pa graba tur esey den un storia.

   Samantha Illidge ta encarga cu e parti aki di produccion di short-film, pero el a splica cu e presentacion lo no djis pa mira e pelicula cu hobennan a traha, pero e lo ta un momento caminda tur hende den publico lo por bay mira con tur esaki a haya un bida di su mes.  Pues e escena, e baile, e pelicula, y hunto cu e short-film lo bay tin un presentacion en vivo tambe, cu musica en vivo cu baliamento.

   Illidge a indica cu durante e anochi, lo bay tin hopi interaccion pa asina publico cuminza pensa, ta kende nos ta, e unidad riba e isla, y di unda nos ta bin, y unda nos kier bay den nos identidad.

   Diabierna 27 di Juni tin presentacion na plenchi di Filomena College MAVO, for di 8:00 pm te cu 9:30 pm, cu premiere di e shortfilm “Connecting The Dots”.  E ta habri pa publico tambe.

   Diasabra 28 di Juni lo tin na Scol di Arte for di 8:00 pm te cu 9:00 pm e premiere di e shortfilm ‘Celebration”.  Tambe ta habri pa publico.

   Diamars 1 di Juli tin e Exposicion Final na Cas di Cultura for di 7:00 pm te cu 9:00 pm.  E ta habri pa public pagando 5 Florin, pero sigura bo asiento via e website aki:

www.bit.ly/hi-storia

   Publico di Aruba ta invita pa bay mira e presentacionnan aki, incluyendo e exposicion final.