Minister Wendrick Cicilia a reuni cu Hunta di Supervision di A.T.A. pa enfoca riba futuro di turismo

ORANJESTAD (AAN): Diahuebs mainta, Minister Wendrick Cicilia tabatin un reunion importante, caminda a combersa riba e futuro di turismo na Aruba.

Entre esnan presente den e reunion tabata Ronella Croes, CEO di Aruba Tourism Authority, Jo-Anne Arends como Presidente di Hunta di Supervision di ATA y demas miembronan di e Hunta di Supervision.

Durante e reunion a combersa riba diferente topico importante, manera e maneho di turismo di pais Aruba den preparacion di e Plan Corporativo, pero tambe e Presupuesto di A.T.A. pa aña 2027. A hiba un dialogo habri riba e diferente proyectonan cu turismo ta trece cu ne.

Por corda bek cu Minister Cicilia a anuncia un trayecto cu a inicia, cu t’e desaroyo di un maneho nacional pa turismo. Den e prome sesion a combersa ampliamente cu e stakeholdernan riba e caminda padilanti, recalibrando e diferente factornan di turismo, ademas a papia riba diferente punto di orientacion.

Den e di dos sesion, a profundisa un poco mas riba diferente tema. Di e manera aki ta reenforsa e sentimento di dialogo cu e intencion pa coopera intencionalmente cu e stakeholdernan den e sector di turismo. Den e di dos sesion a combersa tambe riba e ampliacion di e puntonan strategico.

N’e momentonan aki ta preparando pa e di tres sesion, caminda lo atende cu e implementacion di e vision strategico determina y diferente proyecto concreto y tambe pa fortifica economia y turismo di Aruba. Asina por garantisa cu nos tin un Aruba fuerte, cu por surpasa e momentonan dificil, pero tambe crea oportunidad pa esnan cu kier participa den e beneficionan economico di pais Aruba.