Reconocemento na un pionero den ordenacion y planificacion teritorial Isabel Alves Dammers

Celebracion di cuarenta aña di servicio:

ORANJESTAD (AAN): Gobierno di Aruba ta reconoce y honra cu gran aprecio e cuarenta aña di servicio publico di Isabel Alves Dammers, un profesional cu a dedica su conocemento, experiencia y compromiso na bienestar y desaroyo di Aruba.

Despues di a completa su estudio, Isabel Alves Dammers a bolbe Aruba, unda el a inicia su trayectoria profesional y a haci historia como e prome hende muhe cu a desempeña e funcion di landmeeter na Kadaster. Cu dedicacion y profesionalismo, el a contribui na desaroyo di e area di landmeting y maneho di tereno na Aruba.

Durante su trayectoria largo den servicio di Gobierno, Alves Dammers a forma parti di e Management Team cu a contribui na fundacion y desaroyo di e departamento di Gobierno cu despues a evoluciona pa Departamento di Infrastructura y Planificacion (DIP).

Den su funcion di liderazgo, Alves Dammers a encabesa e Hoofd Afdeling Beleid Ruimtelijke Ontwikkeling (BRO), dentro di Ruimtelijke Ordening en Planologie (ROP), y tambe a tene responsabilidad den e area di ROPV. Su amplio conocemento di e diferente materia relaciona cu ordenacion y planificacion teritorial, construi durante hopi aña di experiencia practica, compromiso y dedicacion.

Un aspecto particular di su trayectoria ta e manera cu Alves Dammers a comparti su conocemento cu colega y empleadonan. A traves di guia, orientacion y acompañamento, el a yuda hopi empleado desaroya nan capacidad y cumpli nan tarea cu mas conocemento y profesionalismo. Di e manera aki, su aporte a pasa mas leu cu su propio funcion y a bira parti di e formacion di generacionnan di profesionalnan dentro di servicio publico.

Alves Dammers tambe a contribui na e proceso di elaboracion di e prome Beach Policy pa Aruba, un aporte importante na e manera cu Aruba ta mira e maneho, uzo y proteccion di su costa y areanan di beach.

E cuarenta aña di servicio di Isabel Alves Dammers ta representa mas cu un trayectoria profesional. Ta representa compromiso, conocimento, experiencia, liderazgo y servicio na Aruba. Un hende muhe cu a pone su talento y dedicacion na servicio di pais y cu, durante cuarenta aña, a comparti su conocemento pa fortalece e institucion y e personanan cu ta traha den dje.

Gobierno di Aruba ta expresa su profundo aprecio y gratitud na Isabel Alves Dammers pa cuarenta aña di dedicacion y servicio leal na pais, y ta desea reconoce e legado profesional cu el a construi y cu ta lagando atras.