Minister Wendrick Cicilia a participa den e 5K Runway Run di Aeropuerto Internacional Reina Beatrix

ORANJESTAD (AAN): Diadomingo 6'or di mainta, Minister di Turismo, Transporte y Labor mr. Wendrick Cicilia,

a participa pa prome biaha den e tercer edicion di e “5K Runway Run”, un evento unico y inspirado organisa pa Wings of Hope, riba e pista di Aeropuerto Internacional Reina Beatrix.

Un total di 150 participante a haya e oportunidad exclusivo pa core 5 kilometer riba e pista di aterisahe, un experiencia unico cu un causa noble. Minister Cicilia tabatin e honor pa habri oficialmente e careda, y a surpasa personalmente e reto, terminando e ruta cu perseverancia y  determinacion. E mandatario tabata acompaña pa amigo, Giovanny Villamizar unda ambos for di 5'or di mainta caba tabata riba pista pa warm up riba tereno di aeropuerto.

Wings of Hope, un fundacion caritativo forma pa un grupo di empleado di Triple A, tin como meta principal pa recauda fondo pa sostene fundacionnan local cu ta impacta positivamente nos comunidad. Pa e ocasion aki, a recauda fondo pa Fundacion Autismo y Fundacion Ban Uni Man pa Cria Nos Muchanan.

Fundacion Autismo ta brinda sosten na e personanan cu autismo, su famia y cuidadonan, mientras cu Fundacion Ban Uni Man pa Cria Nos Muchanan, ta percura pa tur mucha den necesidad por haya un desayuno cu ta algo basico den nan desaroyo educativo. E dos fundacionnan a ricibi un donacion di 10 mil florin, un gesto cu sin duda lo fortalece nan metanan noble.

Minister Cicilia a expresa su gratitud na Wings of Hope pa e tremendo esfuerso den organisa e 5k Run aki cu ta genera fondo y duna esaki bek na comunidad. E meta pa mehora bienestar di nos ciudadanonan, ta alinea cu e meta di Gabinete AVP-Futuro pa un comunidad cu empatia,  inclusivo y comprometi cu bienestar pa un y tur.