ORANJESTAD (AAN)- Minister Presidente a presenta e Jaarverslag di aña 2021 di su ministerio, den conferencia di prensa di Dialuna mainta.
Esaki ta e relato cu e ministerio cu Prome Minister ta lidera, a eherce, durante aña 2021. El a menciona cu ya tin cuater aña consecutivo cu e ta presentando e informe anual aki: esta, 2018, 2019, 2020 y 2021 cu a keda cla awo.
E mandatario a bisa cu tabata tin un tiki atraso, pero simplemente e volumen di trabao no a permiti pa e keda cla prome. Y jaarverslag a keda presenta na Parlamento tambe pa e parlamentarionan por a haye den e transcurso di Dialuna mes, tuma no ta di dje y keda informa tocante kico tur su ministerio ta atende cune.
E dignatario a indica cu e jaarverslag tambe ta wordo publica riba e website pmo.arubagov.org., pa asina tur hende por tin acceso na dje y ken cu kier tuma nota di dje por manda un email na su ministerio y nan lo share e link. Ademas el a wordo manda pa Biblioteca Nacional y tambe na BUVO, pa asina tur hende por tin acceso na dje.
Minister Presidente a sigui splica cu esaki ta e Ministerio di Asuntonan General, y den e caso aki Integridad pa algun luna, te ora cu el a pasa e cartera aki pa Minister Ursel Arends na September, mescos cu Ordenamento Teritorial, Infrastructura y Medio Ambiente.
Organizacion di Gobierno, Innovacion tambe ta cay bao di su ministerio y Energia te momento cu el a pase pa Minister Glenbert Croes, na September.
E ta un documento di 85 pagina, e mandatario a señala, y Dialuna el a trata tres capitulo y den otro conferencia di prensa e lo amplia y contesta preguntanan cu prensa por tin.
Aña 2021, cu e relato aki ta describi, tabata un aña hopi particular. E tabata un aña pa cual gobierno tabata tin hopi plan, sinembargo door di Covid-19, nan a wordo limita hopi den ehecucion di varios plan. “Y nos no mester lubida cu gobierno a cay dia 30 di Maart aña pasa. Tabata tin eleccion dia 25 di Juli y formacion a keda cla dia 20 di September ora cu Gabinete Wever-Croes 2 a huramenta. Pues e ora ey por mira cu den e periodo di 30 di Maart te cu September, solamente asuntonan coriente por a wordo trata, y no aspectonan nobo of proyectonan nobo”, Minister Presidente a comenta.
El a bisa cu aunke no hopi a wordo realiza, asina mes hopi trabao a wordo ehecuta den su ministerio, den e 85 paginanan aki.
https://diario.aw/categories/noticia/general/minister-presidente-a-presenta-pa-prensa-e-jaarverslag-di-ana-2021-di-su-ministerio#sigProId621742fa30