Minister Presidente a pidi DOW pa awo si acelera e trabaonan di infrastructura dilanti hotelnan high rise

“E placa tey y destaho ta bay tuma lugar”

ORANJESTAD (AAN) – Minister Presidente Evelyn Wever-Croes, den un entrevista cu DIARIO relaciona cu e trabaonan cu ta tumando lugar, cu retraso, riba e camindanan dilanti hotelnan, den e area high rise, a menciona cu DOW ta den contacto cu e comerciantenan doño di hotel, y AHATA ta hopi envolvi y interesa tambe pa yuda cu drechamento di e infrastructura dilanti e area 'high rise' aki.

E mandatario a declara cu den e presupuesto di e aña aki, gobierno a inclui pa cuminza cu e trabaonan den e prome mitad di aña y el a wordo informa cu e trabao mester bay den tres fase, y cada fase ta tuma mas of menos mitad di aña.

            E prome fase ta tuma un banda di caminda (pasobra no por cera full e caminda) mientras na e otro banda trafico ta sigui. E di dos fase ta e otro banda di caminda, y e di tres ta embeyecimento.

E dignatario a subraya cu e riolering y e asunto di RWIZ tur esey mester wordo resolvi. “Lamentablemente, nan a cay atras cu e trabaonan. No a cuminza prome cu mitad di aña, pero aworaki ta den fase di destaho, y mester bisa si cu ora yega fin di aña cu awa ta yobe hopi, e ta stroba trabaonan grandi asina”, Premier Wever-Croes a señala, agregando cu e placa tey y e destaho ta bay tuma lugar mas pronto posible.

            Esaki ta wordo haci den consulta cu e hotelnan den e area di high rise pa nan sa ki ora e trabaonan ta tumando lugar, teniendo cuenta cu temporada halto y temporada abao, mas tanto posible. Esaki ta algo cu ta bay wordo haci conhuntamente, segun e dignatario.

            El remarca cu el a pidi DOW pa por fabor haci e trabaonan lihe y cu pa fin di aña y comienzo di otro aña, ya por mira un parti di mehoracion y cu e por keda full cla na final. E trabaonan aki ta completamente den man di Departamento di Obranan Publico (DOW), e mandatario a remarca, cu contratistanan local. Den e ultimo fase, e hotelnan den strip ta bay wordo envolvi, pa wak ki parti nan kier tuma over, pasobra si nan yuda e ta bira mas bunita, y gobierno ta bay sinta na mesa cu nan tocante esaki.