BIRMINGHAM, Alabama: Un Hues Federal a bay di acuerdo pa pospone pa otro fecha, e caso hudicial contra Joran van der Sloot riba acusacion di extorsion.
E caso lo bay socede awor mas despues e aña aki, pa asina duna su abogadonan defensor mas tempo pa prepara.
Joran van der Sloot kende ta e sospechoso principal den e desaparicion di Natalee Holloway na Aruba na 2005, ta wordo acusa di a trata di extorsiona placa di e mama di Natalee, a cambio di divulga unda nan por bay haya restonan mortal di e yiu muher.
Hues Gray Borden e siman aki a bay di acuerdo cu e peticion di Joran, pa pospone e caso, cu awor a haya un fecha nobo cu ta alrededor di 4 December 2023.
Abogado di Joran, esta Kevin Butler a pidi pa pospone pa asina e por haya mas tempo pa “revisa e descubrimento, y investiga e caso aki, y prepara pa Corte.”
Fiscal Federal no a opone e peticion. E fecha di e caso mes lo wordo poni separa door di un District Judge.
Mirando e necesidad di defensa pa adecuadamente prepara su mes y pa haci un decision informa riba sea ta entrega un declaracion di culpable of sigui pa caso den Corte, decision ta cay cu pa husticia wordo sirbi adecuadamente, ta extende e deadline di e caso, y lo sigui cune despues.
Aunke e no ta wordo huzga pa haci algo cu Holloway, e acusacionnan di extorsion y fraude ta e unico crimen cu ta liga e homber hulandes cu e desaparicion misterioso na Aruba.
Joran van der Sloot a wordo extradita pa Merca for di Peru, unda e ta sintando un castigo di 28 aña di prison, despues di a confesa pa mata un hoben Peruano na 2010.
