Investigacion profundo di DIARIO di realidad mundial ta culmina
*Petroleo ta pasa 95 Dollar pa baril den explosion prijs di cuminda
*Programa Mundial di Alimento a proclama crisis historico di alimento
ORANJESTAD (AAN) — 2023 mester a bira oficialmente Aña di Recesion mundial.
E impacto cu un proclamacion di recesion ta produci, a haci cu tur pais a tuma medidanan y a crea e impresion cu hende a logra domina recesion.
Manera DIARIO a informa tur tempo, e panico cu recesion lo azota mundo, a haci cu productornan di petroleo a dicidi di baha nan prijsnan y a crea e pensamento cu problema a pasa.
Investigacionnan internacional y local cu DIARIO ta realisa y manera DIARIO a informa su lectornan, e fantasia di berdad di caida di prijs di petroleo cu mundo a crea pa drenta 2023 sin recesion, no a afecta hopi prijs mundial cu nunca a baha na e prijs prome cu petroleo a causa inflacion na 2023.
Den varios sector, manera di transportacion, e caida di prijs di petroleo cu a evita recesion, a nivela problemanan serio manera cambionan cu mester wordo haci na barconan den cuadro di clima y pagonan cu por wordo exigi na medionan di transportacion pa nan aporte na cambio di clima.
Prijs di cuminda mundialmente ta afecta hende, cu hopi bez pa motibo di berguensa no ta mustra cu e placa cu e tin pa alimenta su mes, a bira menos.
Realidad ta cu costo di bida mundialmente a sigui subi pa motibo di e prijs di cuminda, cu ta afecta sigur bida di personanan cu ta sufri di cierto enfermedadnan pero tambe famianan cu mester mira con ta pone cuminda riba mesa.
Na Hulanda, mas placa den cartera a bira e exigencia di Pueblo cu ta bay urna electoral, caminda e aumento enorme di costo di bida, segun tur informante ta bay hunga un papel enorme debi na e forma cu e ta mishi directamente cu e poblacion Hulandes den tur sector.
Na Merca, pobresa scondi ta uno di e problemanan grandi mientras cu na paisnan cu menos entrada of bou mando di dictadornan, hamber y miseria ta presenta su mes.
Pa Aruba prome investigacionnan di DIARIO di cifra y sensacion publico di costo di bida, ta mustra cu sigur prijs di cuminda ta un problema den varios cas di famia.
Esaki ta logico pasobra Aruba ta pais cu mester importa mayoria di su cuminda. Cifranan oficial ta proba cu importacion na Aruba a subi drasticamente den balor di e mercancia y e placa cu ta marca balor financiero di importacion.
DIARIO na un forma constante a informa Aruba ampliamente di e efecto cu desaroyonan mundial tin riba costo di bida y ta bay culmina na momento cu prijs di petroleo ta acerca 100 Dollar pa baril, na inicio di e epoca di fiesta durante cual tur prijs lo sigui subi a base di e costo actual.
Cu na nivel internacional tin preocupacion serio pa alimentacion di hende den e futuro directo y e costo di bida, ta bini dilanti den diferente actividadnan internacional, caminda gruponan di interes comun ta discuti e desaroyonan preocupante cu otro.
World Food Programme, for di prome cu e explosion nobo di prijs di azeta, a mustra riba e actual crisis mundial di alimentacion, cu a alcansa proporcionnan historico.
783 Miyon persona na mundo no tin un fuente pa nan alimentacion.
Conflictonan mundial, manera e Guera na Ukraine pero tambe tanto otro cu kier ignora, ta crea fugitivonan, hende sin entrada pa come pero tambe ta laga camponan cu mester produci cuminda, destrui y sin e produccion natural.
Cambio di clima ta sostene e aumento enorme di prijsnan di alimentacion y ta deshaci di intentonan rond mundo pa hende produci cuminda.
No solamente mester produci material nobo pa e produccion di cuminda, pero condicionnan di clima ta destrui cosecha y asina ta sigui manda prijs di cuminda halto.
Cu asistencia experto di varios pais, DIARIO ta keda den buskeda di mas informacion pa Aruba, caminda manera DIARIO a anuncia, prijs di gasolin a subi y lo sigui subi por lo pronto si tuma nota di e prijsnan mundial di petroleo.
Como pais turistico tambe Aruba mester tene e aumento di prijsnan basico mundial na bista.
E costo di e sector di “Food and Beverage”den e produccion nacional turistico, ta sumamente importante. E ta afecta turismo na tur nivel.
Ora prijs mundial di cuminda y bebida subi e ta mishi cu e hotel, pero tambe cu tur e negoshinan cu ta ofrece cuminda y bebida na e turistanan na Aruba sea cu nan ta bini cu plannan prepaga of no.
Pa mantene prijs ora costo subi mester baha e calidad y esaki ta afecta e calidad comercial di e pais.
DIARIO lo sigui informa Aruba debidamente tur factor cu mester hunga un papel den realisacion di solucionnan.
