Minister Presidente a duna un presentacion con Gabinete Wever-Croes ta organiza

ORANJESTAD (AAN) — E prome tema cu Minister Presidente mr. Evelyn Wever-Croes a trata, den e conferencia semanal di prensa Dialuna 15 di November awo,

y cu a capta hopi interes general, ta “con e ministerionan di e Gabinete Wever-Croes-2, ta organiza”.

E dignatario a comenta cu el a haya preguntanan for di sindicatonan, durante e bon reunion cu nan tabata tin, tambe di cierto gremionan y di Parlamento.

“Y awe mi kier comparti cu boso e maneho di Gabinete Wever-Croes-2, cu por cierto ta un maneho-1 caba y nos a continue.

Ora nos a drenta gobierno, na 2017, no tabata tin ningun structura pa loke ta trata e personal cu ta traha cu minister. Cada minister tabata dicidi ken e ta trece pa traha cune, cuanto hende e ta trece, y cuanto e kier paga cada hende cu ta traha cune. Asina, hendenan cu tabata haci e mesun trabao, tabata haya diferente pago, depende di cierto circumstancianan, pero nada tabata documenta ni oficial. E tabata un free for all”, Minister Presidente a señala.

E dignatario a agrega cu na 2017 su gabinete a drenta y a dicidi cu ta bay organiza tambe na e bureau di ministernan, pasobra no por ta asina cu henter gobierno ta organiza, y net caminda e ministernan mes ta traha, no ta organiza.

Minister Presidente a indica cu nan a cuminza cu un organogram, y el a mustra riba grafico con esaki ta set up. Esun prome ta mustra con un ministerio ta hinca den otro, en general. E ta splica cu ariba ta bin e ministernan y su conseheronan “inhoudelijk” of Huridico.

El a splica cu “inhoudelijk” ta depende cu si e tin e cartera di infrastructura, e mester di un consehero di infrastructura, y esnan huridico cu tur minister mester tin; ademas e “begroting Coordinator” pa atende cu e temanan di presupuesto, e hefe di bureau. Minister Presidente a bisa cu e no tin hefe di bureau pero e ministernan por tin un si nan ta haya cu ta necesario den su organizacion. Y despues ta bin e demas funcionnan cu tin cu no tur ta yena.

E mandatario a subraya cu e ministernan por tin escogencia den nan, por ehemplo, nan por tin un boder, un persona di seguridad, un chofer, y no tur minister tin esaki tampoco, pero e como prome minister, si. Tin tambe e sosten administrativo y secretariado, esnan cu ta yuda den comunicacion, y e consulent, cu ta esun cu ta yuda e minister cu publico.

Esaki ta e organizacion di cada ministerio, e dignatario a menciona. E dignatario a sigui cu otro grafico, pa mustra e siguiente paso cu su gabinete a duna. Pues, no solamente bisa con grandi un organizacion mester ta, y su gabinete mes a limita na 25 hende pa cada ministerio. Nan ta splica tambe e funcionnan cu ta riba e organogram con nan ta haci cu nan pago.

“Pasobra manera mi a bisa, ora cu nos a drenta den gobierno, nos a ripara cu no tabata tin un structura y cada ken tabata wordo paga segun otro criterionan, y tin cu tabata desvia, enormemente, di locual tabata usual den gobierno”, Minister Presidente a señala.

Den otro articulo DIARIO ta sigui elabora riba e tema aki.