ORANJESTAD (AAN): Despues cu a tuma lugar un incidente Diadomingo entre yiu homber di Prome Minister Evelyn Wever Croes y e yiunan homber di politico Michael Williams,
Dialuna mainta durante un conferencia di prensa, a puntra e Prome Mandatario su reaccion riba locual a sosode.
Tambe a puntra e Prome Minister tocante e hecho cu den prensa a sali publica cu un otro yiu di dje lo a viaha usando protocol.
Wever Croes a cuminza na bisa cu ora cu su yiunan viaha, nan ta drenta for di porta di dilanti y ta sali for di porta di dilanti.
“Ningun protocol ta wordo uza”.
Apenas tin protocol pa e ministernan debi na COVID-19.
Ta un compania priva ta duna protocol y nos mes no ta haya mucho protocol.
Nos ta drenta y sali for di porta di dilanti, segun Wever Croes.
Pa loke ta e incidente di Diadomingo, e Prome Mandatario a splica cu su yiu homber a wordo agredi pa casa di parlamentario di AVP Gerlien Croes, kende ta yiu di e politico Michael Williams.
“El a wordo agredi di patras, unda cu ta dos biaha nan a dal e”.
E yiu di Michael Williams aki a sigui nan y a drenta un restaurant unda cu nan tabata comiendo y celebrando cumpleaños di pareha di mi yiu homber.
Nan a cuminza tira cu glas y destrui full e lugar, segun Wever Croes.
El a bisa cu esaki ta algo cu e ta lamenta profundamente no solamente como mama, sino simplemente pa Aruba.
“E asunto aki ta den man di husticia y aworaki nan ta entregando un keho, pues ban warda pa wak kico husticia ta bay haci”, segun Prome Minister.
