Minister Oduber a reuni cu directiva di Asociacion di Specialista Hospital di Aruba

Kier traha pa un causa comun: mehora e calidad di cuido na Aruba

ORANJESTAD (AAN) – Diamars atardi Minister di Salud Publico Sr. Dangui Oduber a reuni cu e directiva di Asociacion di Specialista Hospital di Aruba (ASHA) encabesa pa Dr. Leong. Den e reunion aki Dr. Leong a presenta su directiva nobo na e mandatario.

            E tabata un bon reunion caminda e directiva a haya e oportunidad pa presenta nan puntonan di preocupacion pa cu cuido medico di Aruba na e mandatario.

            Minister Dangui Oduber a señala cu ASHA y Ministerio tur dos kier traha pa un causa comun, esaki ta pa mehora e calidad di cuido na Aruba. Tambe ASHA kier traha conhuntamente cu Ministerio riba diferente nivel pa eleva y mantene e calidad di cuido y servicio cu ta ser duna. Den esaki hopi pensamento a keda intercambia con pa atende cu e scarcedad di specialistanan cu tin actualmente.

            Den esaki a intercambia opinion riba e tema di AruBIG cu sigur lo yuda combati e fenomeno mundial di scarcedad den profesionalnan medico. Como cu e ta algo nobo ASHA a indica cu pa nan ta importante pa por keda garantisa un nivel halto di cuido.

            Minister tin pleno confiansa cu e instituto di calidad lo percura pa Aruba mantene e nivel di cuido. ASHA tambe tin deseo di participa den e instituto di calidad pa asina hunto determina e calidad di cuido.

            Minister Dangui Oduber a keda masha satisfecho con e reunion a bay caminda ASHA a mustra boluntad di nan banda pa traha y yuda otro den causa comun di mehoracion di cuido.

            Finalmente e mandatario a gradici e directiva di ASHA y a pidi nan pa semper mantene e dialogo habri.