ORANJESTAD (AAN):Diaranzon mainta durante un conferencia di prensa di fraccion di MEP, parlamentario Parlamentario Setty Christiaans-Yarzagaray a papia tocante plannan pa reactiva economia.
“Ta hopi importante pa traha pa reactiva nos economia, mirando cu Hulanda ta indica cu e no ta duna asistencia mas”.
Comercio y nos tur mester purba reactiva y ban bek y restablece e normalidad cu nos tabata tin prome cu COVID-19, segun e parlamentario.
El a sigui bisa cu el a tuma nota di e hecho cu APA a presenta su Master Plan na Gobierno.
Segun Yarzagaray, e Master Plan ta mustra di ta enfoca riba 4 area, incluyendo entre otro e terminal na Barcadera, turismo di crusero y Port City cu ta un parti di real estate y un parti maritimo.
“Tumando nota di esaki como e parti cu ta presidi e comision fiho di turismo den Parlamento, a acerca nan tambe pa asina Parlamento por ricibi un presentacion di nan Master Plan.
Esaki mirando cu e ta bay ta un inversion di 500 miyon y segun e cifranan, esaki lo aporta cu mas o menos 4% di GDP di Aruba, segun Yarzagaray.
El a sigui bisa cu hopi biaha ATA tambe ta referi na 2019 como e mihor aña y ta compara Aruba cu esaki.
“Pa yega bek na e nivelnan halto aki, ta haci cu nos tin un spectativa grandi pa kico y con nos ta bay yega eynan y ta necesario tambe pa yega na un normalidad, pa asina Aruba depende bek di su ingresonan y nos depende menos di asistencia di otro paisnan, en especial Hulanda, segun Yarzagaray.
E parlamentario a sigui bisa cu ATA a entrega nan presupuesto pa 2022 y nan planificacion pa 2022-2023 na Gobierno, pues Parlamento tambe ta desea di ricibi un presentacion di ATA riba esaki.
“Si tin un cos cu por reactiva nos economia ta turismo, pasobra e infrastructura tey caba”.
