ORANJESTAD (AAN): Diaranzon mainta ma Cede di MEP a tuma lugar un conferencia di prensa di e fraccion di e partido geel den Parlamento.
Durante e conferencia di prensa, parlamentario Shailiny Tromp Lee a indica cu MEP un biaha mas tin un campaña pa yena formulario di belasting.
“Originalmente esaki tabata pa dos siman so, pero mirando cu e registracionnan a keda drenta, despues cu den e dos simannan nos a yuda alrededor di 700 hende yena nan formulario di belasting di 2020, despues di e combersa cu nos boluntarionan nos a dicidi pa amplia e campaña cu un siman mas”, segun Tromp.
El a sigui bisa cu otro siman ta e ultimo siman cu e partido ta ofrece yudanza na pueblo.
Segun e parlamentario, contrario na otro añanan, bo tin cu yama pa traha cita.
Esaki ta relaciona cu e situacion di COVID-19.
E number cu mester yama pa traha cita ta 5931026.
Diamars 26 di October, Diahuebs 28 di October y Diasabra 30 di October lo yuda yena formulario.
Diamars y Diahuebs esaki ta di 9’or di mainta te cu 12’or di merdia y 6’or di atardi te cu 9’or di anochi y Diasabra ta di 9’or di mainta te cu 1’or di merdia.
E yenamento di formulario ta tuma lugar na Cede di MEP.
Corda bin cu tur documento relevante.
