Minister Maduro a atende reunion virtual di IMF riba e efecto di COVID19 pa Paisnan den Caribe

ORANJESTAD (AAN)- E siman aki Minister Xiomara Maduro den cuadro di e reunionnan Anual di IMF, a atende un reunion virtual hunto cu otro Ministernan

y Presidentenan di Banco Central di Paisnan den Caribe riba e topico "Overcoming the Crisis, a Stronger, More Resilient Caribbean".

            Durante e reunion e participantenan a haya oportunidad pa trece nan experiencia y nan preocupacion riba e efecto cu COVID19 a trece cune pa esnan mas vulnerabel.

            A trata topico manera resistencia pa vacuna, sosten brinda na comercio, subida grandi di debe nacional y inclusion digital den forma di acceso na broadband internet y tambe mas posibilidad pa haci pago den exterior.

            E reunion aki ta duna Paisnan den Caribe e oportunidad pa duna IMF un bista concreto riba e retonan cu ta specifico pa e region di Caribe pa asina IMF por ta bon informa ora di brinda asistencia den e region.