ORANJESTAD (AAN): E barco ‘Serenade of the Seas’ di Royal Caribbean International lo bay tene na 2023, un viahe crusero di 274 anochi, cu lo ta “esun mas largo y completo di mundo”
bishitando mas di 150 destinacion den 65 pais, y 11 maraviya grandi di mundo, desde Macchu Pichu na Peru te hasta e Taj Mahal na India, segun e compania a divulga den un boletin.
Serenade of the Seas tin capacidad pa casi 2.500 pasahero, y e lo start e viahe for di Port di Miami dia 10 di December 2023, y lo regresa dia 10 di September 2024, segun Royal Caribbean, cu ya caba a cuminza tuma reservacion pa e “aventura epico” aki cu ta mihor cu e Viahe rond mundo di 80 dia di e buki skirbi pa Jules Verne.
E prijs pa e asina yama ‘Ultimate World Cruise’ ta cuminza na 60.999 Dollar pa persona, segun e compania a indica. E pasaheronan lo bay conoce 57 destinacion nobo pa cruseronan, manera Casablanca (Morocco), Qaqortoq (Groenland), y Shimizu (Japon), cu ta e porta pa entrada di Sero Fuji.
“E pasaheronan cu ta bay puntra na unda nan lo bay despues, nos lo bisa nan pa tur caminda,” ta loke Michael Bayley a bisa, kende ta President y CEO di Royal Caribbean International.
Pero si bo no kier viaha tur e 274 anochi aki, bo por viaha cuatro opcion menos largo sea via Continente di America, Asia-Pacific, Mediteraneo, y Norte Europa.
E prome parti ta di 10 di December 2023 te cu 11 di Februari 2024, cu ta inclui destinacionnan Caribense “perfecto pa un postcard” manera Aruba, Bonaire, Curacao, Mexico, Centro America, Sur America, Antarctica, y viahando door di Cape Horn.
E expedicion Maraviya di Asia y Pacifico ta di 11 Februari pa 9 di Mei 2024 y ta inclui 40 destino na Oceania, Asia, y Australia. E seccion di Tesoro di Medio Oriente ta di 9 di Mei pa 10 di Juli 2024 cu 44 destinacion.
Finalmente tin e seccion di viahe “Capitalnan di Cultura” di 10 di Juli pa 10 di September 2024, y lo haci posible un experiencia cultural fuerte cu ta cuminza na Mediteraneo y ta dirigi pa Norte di Europa.
Pues sea bo ta haci full e viahe di 274 anochi, of ta escoge un di e cuatro etapanan.
