ORANJESTAD (AAN): Recientemente parlamentario di MEP Shailiny Tromp-Lee a papia riba e hecho cu Gobierno a decreta luna di October como luna di nos adultonan mayor (nos grandinan).
Segun e parlamentario, fraccion di MEP den Parlamento kier duna atencion debido na nos grandinan no solamente via actividadnan social, pero tambe ta buscando manera pa ta un vehiculo of brug den direccion di Gobierno, pa loke ta peticionnan y puntonan di urgencia pa e grupo aki di habitante di Aruba.
“Mi tin cu bisa cu nos tabata tin un encuentro hopi ameno, caminda cu nos a bay experiencia e famoso actividad na Djiespies Place, caminda cu nos a logra papia cu nos grandinan cu ta frecuenta e actividad aki bon bishita”, segun Tromp.
El a sigui bisa cu nan a duna hopi comentario y cu nan tin nan retonan pa loke ta ehecucion.
Segun Tromp, fraccion di MEP lo duna nan atencion tambe.
“Riba agenda nos fraccion tin cu nos ta bay bishita un grupo nucleo”.
Nos ta pending pa fiha e fecha pa e actividad cu ta bay ta social, pero si cu e meta pa crea un solucion pa e necesidadnan cu nos adultonan mayor tin , segun e parlamentario di e fraccion geel.
El a splica cu e fraccion ta bay bishita Parke Jaburibari, cu ta un parke cu ta wordo uza pa diferente grupo di nos grandinan.
Segun Tromp, tin retonan cu e adultonan mayor aki ta encontra y pesey e fraccion kier bay experiencia esaki y pa ta e voz cu ta pone cu Gobierno ta duna atencion na esaki.
“E intencion ta entre otro pa uso di e parke bira mas accesible pa nos grandinan y mas facil”.
Nos kier reuni tambe cu representantenan di diferente grupo, caminda nos ta bay colecta necesidadnan cu nos tin, unda nos como Parlamento lo por ta esnan cu ta brinda e solucion y na mes momento crea reunionnan den comision fiho pa cu Gobierno, pa nos por crea e solucion cu tanto nan ta desea, segun e parlamentario.
