ORANJESTAD (AAN): Minister di Deporte, Gerlien Croes, a tene recientemente un encuentro di introduccion cu representantenan di CEMEDAR
(Fundacion Centro Medico Deportivo Aruba) como parti di su compromiso pa fortifica e sectornan deportivo di Aruba.
Durante e dialogo, Minister Croes y e delegacion di CEMEDAR a intercambia idea riba e situacion actual y necesidad pa medicina deportivo pa mehora cuido pa atletanan, aumenta nan rendimento y preveni lesion. A pone enfasis riba e papel importante cu CEMEDAR ta hunga den promocion di desaroyo deportivo na Aruba.
Gobierno ta di opinion cu tur atleta mester tin e acceso na cuido necesario pa yega na
nan potencial maximo y CEMEDAR tin hopi conocemento valioso cu por yuda lanta e nivel di
deporte y salud di nos atletanan profesional y tur nos deportistanan en general.
E encuentro aki ta parti di e plan strategico di Minister Croes pa mehora e infrastructura deportivo, stimula bida saludabel y inverti den desaroyo di talento deportivo den tur disciplina y formacion di nos comunidad. Minister Croes a pone enfasis riba e importancia di traha man den man cu otro institucionnan publico y organisacionnan specialisa manera CEMEDAR, pa di e forma aki garantisa cu e vision bira accion real cu resultadonan concreto.
Ambos partido a expresa nan deseo pa sigui traha hunto riba iniciativanan cu ta sostene e bienestar fisico y mental den deporte cu ta contribui na e vision pa un futuro deportivo mas dinamico y inclusivo pa Aruba.
