ORANJESTAD (AAN): Minister di Finansa, Asunto Economico y Sector Primario, Geoffrey Wever,
ta felicita y gradici Sra. Esther Gomez cu su nombracion como directora nobo di Post Aruba N.V. Diahuebs mainta, den presencia di minister Wever, Raad van Commissarissen, empleadonan y demas stakeholdernan, a firma un acuerdo laboral cu Sra. Emerencia-Gomes.
Post Aruba N.V. a enfrenta reto significativo durante hopi aña, tanto den e ambito financiero como operacional. E empresa tabata den necesidad di reorganisacion pa bira mas stabil, competitivo y sostenibel den un mundo di comunicacion cu ta cambia rapidamente. Na nivel global, e industria di post ta den transicion continuo y Aruba no ta un excepcion.
Den aña 2024, como parti di un proceso di reorganisacion, a apunta un Raad van Commissarissen nobo y despues Sra. Esther Emerencia-Gomes hunto cu Sr. Ramoncito Croes a wordo instala como e directornan suplente. Nan tabata encarga cu carga e transicion di Post Aruba pa un rumbo nobo.
Durante su presentacion, Minister Wever a destaca cu e ultimo lunanan tabata tin señal positivo. Despues di 12 aña, Post Aruba N.V. y sindicato SEPPA a logra yega na un acuerdo colectivo nobo (CAO), un paso esencial pa crea stabilidad laboral; un paso di progreso necesario pa por sigui mehora servicio di e compania.
"Mi ta contento cu poco poco, despues di hopi esfuerzo, nos ta mira paso concreto den direccion corecto. Sra. Emerencia-Gomes ta hiba un experiencia amplio, un liderazgo firme y alabes husto, y un deseo pa traha pa un Post Aruba N.V. cu ta resiliente y moderno. Masha pabien y hopi exito cu e trabounan bo tin bo dilanti," Minister Wever a expresa. Tambe e mandatario ta gradici e Raad van Commissarissen pa nan trabou ehemplar y diligente encamina pa yega na e logro aki.
Minister Geoffrey Wever lo sigui traha cerca cu Post Aruba N.V. y su directiva pa apoya e transformacion necesario, pa nan por transiciona pa un modelo comercial mas fuerte, efectivo y orienta riba e necesidad real di comunidad Arubiano.
{gallery}Minister Wever ta felicita Sra. Esther Emerencia-Gomes, directora nobo pa Post Aruba N.V.{/gallery}
