Minister Gerlien Croes ta continua su bishita na scolnan den San Nicolas

ORANJESTAD (AAN):  Diaranson mainta, Minister di Enseñansa, Mr. Gerlien Croes,

a continua cu su bishita na scolnan den districto di San Nicolas, incluyendo Scol Basico Xander Bogaerts, Colegio San Augustin y Graf van Zinzendorf School.

            E bishita aki ta forma parti di un iniciativa pa conecta directamente cu e comunidad escolar y pa fortifica e laso entre e ministerio y esnan cu ta dedica diariamente na formacion di nos futuro, nos muchanan.

            Durante e bishitanan, Minister Croes a tuma e oportunidad pa introduci su mes y sostene dialogo abierto cu cabesantenan di e scolnan. E momento aki tabata un espacio pa conoce, pa comparti pensamento y ideanan, y pa presenta e vision di Minister riba un futuro educativo mas sostenibel.

Un momento di conecta, conoce y comparti ideanan, pensamento y vision. Minister ta reconoce y balora cada un pa e esfuerso diario cu nan ta pone den formacion di nos muchanan.

            "Mi tin hopi admiracion pa e entrega y dedicacion cu cada un ta pone pa garantisa cu nos muchanan ta haya e miho educacion posibel", Minister Croes a expresa. "Nos ta gradici boso pa tur e esfuerso, y mi ta compromete pa sigui traha hunto cu boso pa fortalece nos sistema educativo".

Minister Croes a conclui su bishita cu un mensahe di gratitud y speransa, reafirma su compromiso pa sigui ta presente den e desaroyo y bienestar di cada scol riba nos isla.