Aruba Tourism Authority a reafirma su sosten na KLM Aruba Marathon

Un pilar creciente den turismo 

ORANJESTAD (AAN): Aruba Tourism Authority (ATA) ta masha orguyoso pa reafirma e sosten continuo na KLM Aruba Marathon, un evento emblematico cu a consolida como un componente clave dentro di e strategia di Aruba pa e desaroyo di turismo. Pa di seis aña consecutivo, ATA ta sostene e iniciativa aki cu a demostra di tin un impacto positivo den e posicionamento turistico di nos isla. 

            Desde su inicio, KLM Aruba Marathon a cuminsa como un proyecto piloto cu tur e diferente distancianan rekeri pa ta un marathon internacional, danki na e liderazgo firme di parti di su organisado Kees van Muiswinkel y henter su ekipo. Su compromiso cu excelencia operacional, participacion comunitario y e fortalecemento di e marca turistico a hiba e evento pa supera tur expectativa aña tras di aña.

            E cifranan ta refleha e crecemento di 200 coredo internacional cu a participa e prome aña pa 600 coredo cu a participa na aña 2024 y cu un proyeccion registra di 844 participante internacional for di 41 pais pa e edicion di aña 2025. Cada coredo ta yega Aruba cu un averahe di 2.3 acompañante, locual ta eleva e cantidad di bishitante internacional na 1.941. Den total, nos por spera participacion di alrededor di 2.750 coredo, incluyendo 1.906 participante local. 

            “KLM Aruba Marathon ta mucho mas cu un evento deportivo; e ta un plataforma cu ta alinia perfectamente cu e vision di Aruba como un destinacion sostenibel enfoca riba salud y bienestar. E crecemento continuo di KLM Aruba Marathon ta demostra e potencial di Aruba den e mercado di bienestar y ta reenforsa nos imagen pa e biaheronan en busca di experiencianan activo y cu proposito”, asina Ronella Croes, CEO di Aruba Tourism Authority, a expresa. 

            Mientras ta preparando pa e di shete edicion, KLM Aruba Marathon ta continua cu su compromisonan pa mas aña y ta crece su marca internacional, expandiendo di 24 pais den su prome edicion pa 41 pais na aña 2025. E logronan aki ta reenforsa e posicionamento di Aruba como un destinacion vibrante, energetico y cu ta pensa pa futuro riba e escenario mundial.