Minister Geoffrey Wever a reuni cu Presidente di Eerste y Tweede Kamer tocante revitalisacion di Oranjestad

ORANJESTAD (AAN):   Minister di Finansa, Asunto Economico y Sector Primario Geoffrey Wever y un grupo di comerciante di Oranjestad a reuni cu sr. Jan Bruijn,

voorzitter di Eerste Kamer y sr. Martin Bosma, voorzitter di Tweede Kamer riba e revitalisacion di centro di Oranjestad, den compania di Sr. Vincent Storimans, representante di Hulanda na Aruba (VNO). 

            Den e reunion diferente comeriante local cu ta inverti den centro di Oranjstad y cu ta kere den revitalisacion di Oranjestad a splica tur locual ta sosodiendo den Oranjestad, manera Sr. Jonathan Harms di Pepe Margo Distillery, Sra. Xena Profet di Alba Development, Sr. Harry Koeman di Aruba Wine & Dine, Sr. Frendsel Giel di AIB Bank N.V., Sr. Paul Gielen di Renaissance, Sra. Bianca Peters di 360 Innovation, Sr. Markson Maduro di Apothek y Hoya, Sr. Johan Stoppels di Freeway y tambe Sra. Alice van Romondt. 

            Minister Wever a splica e delegacion kico tur minister Wever a bin ta haci cu sector priva pa Oranjestad, manera e revitalisacion di e area di Wilhelminastraat, restauracion di Cas Veneranda y Aruba Bank cu Stichting Monumentenfonds, construccion di un studentenflat cu FCCA, luznan nobo, ubicacion di diferente departamento gubernamental den Oranjestad y mucho mas. 

            Cada comerciante a haya e chens pa introduci nan mes y splica nan concepto di negoshi. E presidente di Eerste Kamer y e presidente di Tweede Kamer tawata hopi interesa den e desaroyonan den Oranjestad. 

            “E encuentro tawata uno hopi positivo, y mi ta hopi contento pa demonstra con Gobierno di Aruba ta trahando hunto cu sector priva. Mi ta orguyoso di tur loke nos comerciantenan ta haci cu pasion pa e revitalisacion di Oranjestad; ta hunto so nos lo por logra un Oranjestad revitalisa, unda hende ta bida, traha y tin accento pa gastronomia y entertenimento”, segun Minister Geoffrey Wever.