Richella Dorothal, directora di DTI:
ORANJESTAD (AAN) – Richella Dorothal, directora di DTI, den entrevista cu DIARIO a duna di conoce cu e departamento aki ta bay over pa digitalizacion di nan programa, locual lo haci posible cu den futuro, e cliente no tin cu bay dos biaha na DTI.
Aworaki e sistema ta cu e persona ta bin na bali cu su documentonan y e ora ey ta ricibi un cita, y e situacion cu tin biaha DTI ta ricibi email cu no ta cuadra, y ora nan kier comunica cu e cliente via telefon, si yama bek pa haci kizas un cambio afspraak e numbernan tampoco ta cuadra.
Esakinan ta aspectonan cu por bin mehoracion sigur via digitalizacion. Esaki ta un parti di DTI mes, y nan tabata tin diferente combersacion cu otro departamentonan tambe, y e idea ta pa full gobierno bira digitaliza.
Dorothal a bisa cu DTI ta traha strechamente cu otro departamentonan. Pero tambe pa DTI ta necesario pa verifica e registracion di e vehiculonan y tambe pa verifica cu DTI. P’esey e idea ta pa e bira conhuntamente cu otro departamentonan.
E categoria di vehiculo cu cual DTI tin mas reto pa keur, ta esun di transporte publico. Tur aña nan tin cu keur y esaki ta un exigencia mas halto cu mester tin, pasobra ta trata di transporte di publico local y turista.
Esaki ta un situacion unda e responsabilidad mester ta na e companianan di transporte publico cu ta taxi, TO, bus, autobus, y diferente vehiculo cu ta wordo uza pa transporte humano. Directora di DTI a comenta cu nan ta mas den accidente pasobra nan ta trafica mas riba caminda, y datanan forensico ta mustra cu accidentenan a aumenta mas ainda, y tin un porcentahe masha halto cu e persona accidenta no tin ningun seguro, y e parti di keuringsbewijs ta indica cu si e persona no tin seguro lo no tin keuring tampoco.
Esaki ta un aspecto di concientizacion cu ta necesario pa cada ken tuma responsabilidad, di e auto cu nan ta core.
Dorothal a splica tambe cu e parti di registracion ta tuma lugar na DIMP, si ta vehiculonan normal. Aworaki tin un cambio encuanto registracion di bromer. Aworaki e registracion mester tuma lugar via di DTI prome, y a base di locual nan ta registra y den cual categoria e ta cay, nan ta bay DIMP pa registr’e.
