Tyson Lopez, CEO di ACF:
ORANJESTAD (AAN) – Director di Aruba Conservation Foundation (ACF), señor Tyson Lopez, a amplia e informacion tocante e beneficio cu e proyecto cu ACF ta bay desaroya, cu ayudo cientifico di Wageningen University & Research, lo aporta pa Aruba.
E acercamento cu ACF a tuma, Lopez a splica, ta un “Nature inclusive approach” cu ta uza “Nature Based Solutions” y ora inverti den esaki e ta haci e pais mas resiliente. Ora cu tin mal tempo e ta yuda pa e impacto ta menos riba tera.
“Pero tambe ora bo tin coral y pisca, e ta yuda e ora ey cu e parti di pesca. Asina e ta uza e componentenan di naturaleza pa haci nos bida mas sostenible y mas resiliente”, Tyson Lopez a señala.
Den e proceso aki a inclui diferente stakeholders, por ehemplo Santa Rosa, tambe Gobierno, Gobernador, Parlamento y diferente departamento, y diferente otro stakeholder a wordo inclui.
“Den nos caso, nos sa kico nos mester haci como organizacion di conservacion, pero ta importante pa otronan tambe tin idea di locual mester wordo haci pa nos yega na un vision asina” Tyson Lopez, CEO di ACF a señala.
Un componente importante di e vision aki, cu cual ta bay drenta den e revision di ROPV otro aña, e ley aki ta un documento cu por uza pa e proyecto aki. Ta bay tin adaptacion di ROPV na 2026 y eynan ta unda, si nos kier pa e vision aki biba, e vision aki cuminza na haci cierto cambionan.
“Nos ta un pais urbanize y nos sa cu e ta bay sigui crece, dus cu esey ta bay bin hopi challenge, y nos tin cu bay maneha miho. Hopi biaha mi ta papia over di ‘enforcement’ anto esey nos mester siña haci hopi miho, pasobra nos tin bon ley, pero nos mester reenforsa esakinan tambe. Mi ta kere cu ta importante pa nos hisa e conocemento di comunidad, pa nan por compronde pakico nos ta haci cierto accionnan. E no ta solamente awo, den termino cortico, pero den termino largo nos mester garantiza e calidad di bida pa e ser humano y tambe nos naturaleza”, Tyson Lopez, CEO di ACF a conclui.
