Dia Internacional di Hende Muhe 2023 ta exigi presentacion di berdad
*Hende muhe mester debolbe sentido di balor na e ser humano
*Aumento di crimen horibel y caida moral ta destrui futuro di hende
ORANJESTAD (AAN) — Dia 8 di Maart ta sirbi mundialmente pa observa e lugar cu hende muhe mester ocupa den comunidad mundial, loke ta resultado directo di e hecho cu e ta un ser humano.
Ora papia di e ser femenino, ta papia di un hende y esaki tabata e motibo pa e lucha pa e hende muhe haya trato di hende den comunidad internacional.
Pa por trece e hende muhe dilanti, mester atende directamente cu e sentido di dignidad di e ser humano, di e figura central den universo.
Un hende cu kier wordo trata segun su balor, mester duna prueba cu e ta na haltura kico ta balor.
Pa por atende cu futuro di mundo na e forma responsabel cu derecho igual ta duna na homber y muhe, hende mester comprende su responsabilidad enfrente e mundo di awe y di futuro cu e tin den su man.
No por lucha pa hende muhe si no lucha pa e balor di e genero humano, cu ta na peliger serio na 2023 cu su dolor di e Guera di Ukraine, cu ta destrui e ser humano.
Hustamente e guera aki ta pone nos realiza, con hende ta programa loke ta bira e actitud permisibel y apropia di hende enfrente hende.
Muhenan na Rusia ta di acuerdo cu por abusa di muhenan na Ukraine. Odio ta wordo sembra den generacionnan nobo na un mundo, cu diariamente ta perde balor humano for di bista.
Awe pa papia di dia di Hende Muhe, no mester mira logronan material di muhenan a base di Derechonan Universal cu nan a ricibi.
Con e hende muhe ta profila su mes na defensa di dignidad humano, cu mester duna e merito pa su lucha di superacion tur caminda cu ainda e no ta wordo acepta como ser humano real?
Informacionnan horibel ta mira luz diariamente. Horor, cu ta indica cu loke a pasa cu e teenager Marie Likens na 1965, ta ripiti su mes actualmente tur dia.
Marie Likens a wordo tortura na e forma mas cruel dor di su mama di criansa cu a haya asistencia di otro persona, te na momento cu el a muri.
Awe informacionnan di paisnan liber, paisnan caminda hende muhe ta ocupa puestonan responsabel, ta papia di mamanan cu ta exigi nan yiunan menor di edad, presta nan mes na prostitucion pa nan haya placa.
Informacion di ayera ta papia di un mama, cu a mata su propio yiu. Mamanan cruel cu no merece e nomber di mama!
Muhe ta destrui dignidad di otro pa por haya puesto. Muhe ta lubida cu nan mester duna ehempel na nan yiunan y comporta nan mes a base di e moral, cu a haci Aruba ehempel pa mundo.
Awe balor di hende ta na peliger. Moral ta na peliger. Dignidad ta na peliger.Sentimento humano ta na peliger.
Dia 8 di Maart ta recorda curashi y trabou enorme cu hende muhe a realisa pa awe por dicidi den tur libertad, con e ta feliz como hende.
Esaki a haci e hende muhe responsabel pa e calidad di hende den futuro.
Un mama ta dirigente di su famia cu un responsabilidad igual na e hende muhe cu ta dirigi un empresa. Kico e palabra y hecho di un mama, di un hende muhe den comunidad, ta entrega na e mucha cu mester sigui su ehempel?
Futuro ta warda den un comunidad mundial cu a lubida kico ta balor humano, loke ta causa tanto dolor den un mundo cu a conoce tanto cambio, cu casi el a lubida kico ta balor y dignidad di hende, punto central di universo.
