Minister di Turismo contento y entusiasma cu inauguracion di e vuelo nobo Cali-Aruba cu Wingo

ORANJESTAD (AAN)—Diaranzon atardi a tuma lugar, na Aeropuerto Reina Beatrix, e inauguracion di un servicio nobo di e aerolinea Wingo di Cali pa Aruba y viceversa. E aerolinea lo ofrece opcionnan nobo pa biaha for di Aruba pa Cali.

Minister di Turismo, señor Dangui Oduber a hiba palabra, den presencia di Gerencia di Triple A, Gerencia di ATA, Ehecutivonan di e Wingo, y prensa.

E mandatario a expresa cu esaki ta un momento hopi special pa Aruba su turismo, cu otro vuelo inaugural, e biaha aki di Cali pa Aruba. E dignatario a mustra cu Gobierno di Aruba ta hopi contento y gradici cu e confianza di e partnership nobo.

“Nos ta hopi satisfecho, contento y gradici cu e confianza di un partnership nobo di Wingo cu nos aeropuerto y nos pais Aruba. Vuelonan exitoso di Medellin y Bogota pa Aruba y awe cu un vuelo inaugural nobo di Cali pa Aruba. Nos maneho ta dirigi pa trece turistanan afluente pa haci inversionnan  continuo den nos producto Aruba y tambe pa diversifica nos turismo”, e dignatario a expresa.

E mandatario a remarca cu Latinoamerica y specialmente Colombia ta un mercado cu ta ofrece hopi potencial, y Aruba tin un relacion cu ta mustra hopi exitoso cu Wingo y awe e ta comproba cu e duracion ta bay ta duradero y exitoso cu e lanzamento di e ruta nobo entre Cali y Aruba. Cu hopi entusiasmo e dignatario a hiba un discurso, di cual DIARIO ta trece awe e resumen aki, hunto cu potretnan di e evento.