Ministerio Publico ta bay sigui cu e caso contra Otmar Oduber:
ORANJESTAD(AAN): Diahuebs ex politico Otmar Oduber a tene un conferencia di prensa, relaciona cu e decision di Ministerio Publico di sigui cu e caso contra dje, yama ‘Flamingo’.
Mirando cu e caso contra dje a dura asina hopi tempo, via su abogado Vito Carlo, a pidi un asina yama ‘kennisgeving van niet vervolging’, cu ta nifica cu indicacion cu e lo no wordo persigui penalmente.
OM lo a sugeri na dje algun tempo pasa pa negocia, pero awor nan a duna di conoce cu nan lo no haci esaki mas.
Durante su conferencia di prensa, Oduber a indica cu e no kier a negocia y cu solamente e tabata kier un decision oficial cu e lo no wordo persigui mas.
“Ya caba 4 fiscal di Hulanda a wordo manda pa e caso aki, bo ta kere cu ta normal? Nan ta bin keiro un rato pa wak si nan ta haya strepi,”segun Oduber.
“Nan ta bay di aki despues y bo ta kere nan ta worry cuanto placa e pueblo di Aruba a paga den e caso Flamingo?. Ken ta otro ta worry? ningun hende”.
E cosnan aki ta wordo manipula door di Hulandesnan na cabez di e investigacion, segun Oduber.
El a bisa cu ta straño cu nan ta bisa cu nan tin cu pensa si nan lo duna e kennisgeving van niet vervolging of cu nan kier negocia, si pa 4 aña nan ta persigui un persona.
Segun Oduber, si OM ta kere cu nan por a negocia algo pa e no papia cu prensa mas di e caso aki, nan por lubida.
“Mi kier haci un apelacion na Aruba Bank y mi ta spera cu nan ta ‘understand’ berdad. Un total di 27 aña mi tabata cliente di e banco y nan no kier a habri mi cuenta. Mi a bay corte y ma gana mi caso, pues nan mester a habri mi cuenta. Nan kier a huzgami prome cu tin un veredicto. Despues cu mi a gana mi caso, nan a bay Hof, unda cu mi mester a haya un contesta di Hof na Augusts di 2021”.
Otro luna ta bay ta 24 luna di uitstel, segun Oduber.
El a indica cu e ta kere cu nan wardando pa wak si tabata tin labamento di placa etc. den e caso Flamingo, pero awo cu ta cla e kier pa e banco habri su cuenta bek.
“E caso por lo general a caba cu mi emocionalmente, pero e caso di Aruba Bank ta afecta mi tambe”.
Ta yega un momento cu e banco por a bisa cu ta suficiente.
Awor cu a resulta cu no tin nada di labamento di placa etc. y cu su negoshinan ta clean, nan por habri mi cuenta bek, segun Oduber.
El a bisa cu ningun hende a yud'e cu placa di afo y cu tur e placa hinca den su negoshi ta placa di Aruba Bank.
“Mi ta spera cu Hof awor por bisa cu ta ora pa nos caba cu e cos aki, pa mi bay pa tur hende y mi ta bay pa tur hende, cu a perhudica mi”, segun Oduber.
