Adelizah Vrolijk a bira di 5 morto den trafico
ORANJESTAD (AAN): Tabata Diadomingo marduga, esta 2 di Juli 2023 cu yamadanan a cuminza drenta poco despues di 1:00 am na Central di Polis, cu riba e caminda di Meiveld pa Hooiberg, na altura di Pavia tin un accident basta serio a caba di socede.
Mesora unidad di Polis di Santa Cruz a wordo manda na e lugar, y na yegada a bin topa cu un situacion di accident di impacto grandi un poco pariba di e birada unda cu Fundacion Sonrisa ta situa.
A nota cu ta un accident frontal entre un auto y un vehiculo. E auto ta un sedan Toyota Yaris color shinishi, mientras cu e vehiculo ta un Honda CR-V SUV color cora. Debi na e impacto, tanto e Toyota y e Honda a dal un circulo y finaliza uno cara panort, y e otro cara pazuid para tras di otro.
Polis a nota cu ambos chauffeur ta den estado critico, y mesora a pidi pa presencia mas urgente di Ambulans.
Na e lugar di e sucedido a presenta Ambulance, Rapid Responder como tambe vehiculo di rescate di Cuerpo di Bombero. Polis a cuminza tuma declaracion y haci observacion riba caminda, unda posiblemente sea e auto of e vehiculo a hala demasiado na man robez di caminda, y causa asina un impacto frontal violento.
Na yegada di ambulance, paramediconan a stabilisa ambos chauffeur. Usando dos Ambulans, nan a bay cu ambos chauffeur cu maximo urgencia pa Servicio di Emergencia na Dr. Horacio Oduber Hospital.
Polis di trafico como tambe polis tecnico a presenta na e lugar pa haci nan investigacion.
Na Hospital a duna e heridonan e prome tratamento, y debi na golpinan ricibi, a dicidi na hospitaliza e dama den unidad di Cuido Intensivo. Su condicion no a mehora, y Diaranson merdia a drenta e noticia cu pa 12:18 pm, Dr.Vera na Hospital a constata morto di Adelizah Sherrylane Richanella Vrolijk, naci na Aruba dia 8 Juli 1985, pues tin 37 aña di edad. Diasabra awor e lo a cumpli 38.
E dama ta conoci pa tur hende como Lizah, y ta yiu muher di e conocido periodista Leo Vrolijk. E ta ruman muher di e presentador di noticia Andrew Vrolijk na Telearuba.
Bureau Slachtofferhulp tambe a presenta na e Hospital pa brinda sosten na famia di Lizah.
DIARIO y Cuerpo Policial ta manda palabranan di profundo condolencia y forza na su mayornan Leo y Shelley, y su rumannan Jeremy y Andrew, y demas famia, amigo-, y coleganan.
