Minister di Turismo a anuncia e di dos fase di e proyecto di recreacion nobo cu diferente facilidad

Pa local y turistanan topa otro na Kas Ariba:

ORANJESTAD (AAN) – Señora Sila Wever a anuncia, recientemente, un proyecto hopi importante pa e bario di Kas Ariba. Tabata presente Minister Presidente Evelyn Wever-Croes, Minister di Turismo y Salud Dangui Oduber, Minister di Enseñanza Endy Croes, Directora di ATA Ronella Croes, entre otro.

Señora Wever a expresa cu esaki tabata un atardi hopi special pa Kas Ariba, pasobra un y tur presente por a presencia e logro di e Fase 1, di e proyecto aki y den e ocasion aki a bin hunto pa celebra e Fase 2.

Seguidamente, Wever a yama dilanti Minister di Turismo señor Dangui Oduber ken a elogia e proyecto cu ta uno bunita pa Santa Cruz, pero sigur pa henter Aruba.

El a corda cu na 2022 nan tabata tey hunto cu señor Joy Werleman, cu a anuncia e prome fase di e proyecto cu ta e anker cu ta poni den un skina na Kas Ariba, y pa un tempo nan a keda discuti tocante kico lo ta e di dos fase.

E mandatario a duna un resumen tocante maneho di turismo cu tin e meta di trece turista afluente, di calidad, diversifica Aruba su turismo y percura pa e tin un crecemento sostenible, ademas di haci inversionnan continuo den mehoracion di Producto Aruba.

Minister Oduber a comenta cu algun aña pasa e tabata tin un combersacion cu señor Werleman, cu tabata tin actividadnan hopi exitoso na mesun caminda cu e conference di prensa aki a tuma lugar.

Y djey a sali e pregunta si e minister y gobierno tabata interesa pa haci un inversion y percura un bunita plaza unda cu hende local y turistanan por topa otro, y haci di e area aki. E dignatario a bisa cu esaki ta fit den e maneho y vision cu gobierno ta hibando, y djey a cuminza traha riba e plannan  p’asina yega caminda cu e ta aworaki unda cu ya caba a entrega e prome fase di e proyecto y a anuncia, cu hopi orguyo, e continuacion di e di dos fase.

E mandatario a expresa cu no solamente nos mes hendenan ta haciendo uso di e proyecto aki caba, pero turistanan den gran cantidad ta bishita e anker aki na Kas Ariba.

Minister Oduber a subraya cu e intencion ta pa crea un area multifuncional, unda evento, e fiestanan nacional cu joy ta organiza continuamente por bira ainda mas grandi pasobra gobierno ta bay ofrece un miho area cu miho infrastructura.

E dignatario a splica cu e proyecto mes ta encera di e construccion di un speeltuin pa uso di e muchanan di e bario, ta bin un seccion pa haci ehercicio, y lo pone un lugar unda e turistanan por haya informacion tocante Santa Cruz y di Aruba en general. Ademas lo bin cu tribunanan completamente nobo pa ora tin weganan popular, y patras, lo traha un bunita 'deck' di palo pa local y turistanan bin hunto pa relaha y disfruta di e bunita paisahe, y tambe lo upgrade e area aki cu un bunita landscape.