Aruba a duna crusero Costa Fortuna bon bini pa prome biaha

ORANJESTAD (AAN): Siman pasa tabata un dia historico pa e isla, como cu e barco crusero Costa Fortuna a haci su prome bishita na waf di Playa.

   Representantenan di entidadnan principal, manera Aruba Tourism Authority, Aruba Ports Authority, agencia di e barco Armada, departamento di Inmigracion y Aduana a reuni pa asina duna nan un bon bini.

   Costa Fortuna ta renombra pa su elegancia y grandeza, a ricibi un bon bini ora cu el a mara na waf.  Den un momento di aprecio mutuo, CEO Ronella Croes di ATA a extende gratitud na capitan Lazarevic Vlaho y su ekipo dedica, door di presenta un plaquette conmemorativo.  E gesto aki ta simbolisa Aruba su bon bini caluroso y aprecio pa e decision pa inclui Aruba den e itinerario di Costa Fortuna.

   Marc Figaroa como CEO di Aruba Ports Authority, hunto cu Giovanni Raghunath di Armada Port Agency a expresa e sentimento aki, gradiciendo capitan pa escoge Aruba pa haci e bishita.

   E crusero Costa Fortuna ta uno fabrica na aña 2003, y ta cay den e clase Destiny.  El a wordo renoba na December 2018 na Singapore.  E ta un barco di 272 meter di largura, ta 35 meter hancho, y tin 13 dek.  E barco tin capacidad pa 2.702 pasahero (doble ocupacion), pero e maximo pasahero ta yega te 3.470 pasahero.  Tin cuatro restaurant, diesun bar y lounge.

   E barco hopi biaha a nabega den Lama Mediteraneo, y despues tambe tabata haci viahenan saliendo for di China.  E barco ta saliendo e temporada aki awor pa viahe di 7 dia for di puerto di Fort-de-France na Martinique, aunke bo por subi e barco tambe na Pointe-a-Pitre na Guadeloupe y esey ta pa viahe di 14 dia.