Minister di Husticia ta duna splicacion na Parlamento tocante siguridad di trafico

ORANJESTAD (AAN): Pa motibo di e cantidad di accidente di trafico cu resultado fatal y casonan di "hit and run" den e prome simannan di 2026,

Parlamento di Aruba a invita Minister di Husticia mr. drs. Arthur Dowers pa duna splicacion di siguridad den trafico.

   For di miembronan di Parlamento, Minister Dowers a ricibi varios pregunta critico riba e situacion actual, ehecucion di ley y e medidanan preventivo pa reduci e cantidad di accidente di trafico serio. Minister Dowers di su banda a contesta e preguntanan aki cu comprension y basa riba recomendacionnan di e Comision di Siguridad di Trafico institui pa e propio minister. 

   Durante di e reunion a trata, entre otro, e causanan di accidente di trafico, e problematica di "hit and run", y e necesidad pa revisa nos leynan di trafico y crea campañanan di conscientisacion. Minister Dowers a enfatisa cu siguridad di trafico no ta solamente un responsabilidad di gobierno y polis, sino di comunidad den su totalidad.

   Por caracterisa e encuentro den Parlamento como un dialogo cu contenido y hopi critico, unda e importancia di trafico sigur y responsabilidad comparti tabata central. E mandatario di husticia a indica di lo tuma e recomendacionnan di e Comision di Siguridad di Trafico na serio y cu lo traduci esakinan den medidanan concreto di maneho, den colaboracion estrecho cu instancianan involucra.