Stanley Heinze di Stichting Huize de la Salle:
ORANJESTAD (AAN): Pa conmemora 90 aña despues cu Frerenan a bin Aruba y 63 aña di nan presencia den nos comunidad, Stichting Huize de la Salle ta bin cu tres proyecto cu nan ta proyecta cu lo keda cla na december 2027. Un di e proyectonan ta un monumento. E intencion ta pa fiha un luga special unda cu pa semper lo por recorda e Frerenan y e trabou incansabel cu nan a haci pa nos comunidad riba diferente tereno.
E stichting ta trahando riba nan plannan unda e monumento lo bin y ken lo bay traha e structura di esaki. Señor Stanly Heinze di Stichting Huize de la Salle, a menciona cu nan ta sugeri pa e bin riba e rotonde banda di ex-Piet Soda Fountain. Nan ta desea pa señor Ciro Abath y Nigel Matthew traha e monumento. Actualmente, nan ta studiando y trahando riba e diseño.
Señor Heinze a expresa cu e intencion di e proyecto aki ta pa e bira un monumento na unda cu hende por pasa rond dje pa saca potret y keda cu un bunita recuerdo.
Di e manera aki, segun señor Heinze, ta reconoce e impacto grandi cu e Frerenan tabatin riba nos comunidad formando hobennan e tempo ey cu awe ta ciudadanonan profesional y responsabel. E Frerenan tabata un influencia grandi pa e desaroyo di Aruba riba entre otro tereno di enseñansa, cultura y deporte.
“Nos ta kere cu ta importante pa nos comunidad, particularmente nos generacion nobo, sa di e historia aki. Y pa media di e tres proyectonan di Stichting Huize de la Salle (e buki conmemorativo, e documentario y e monumento), Aruba henter ta haya e oportunidad pa conoce e historia di e Frerenan cu a yega Aruba desde 1937 te cu aña 2000, na unda cu e tres ultimo fFerenan a bandona nos isla”, señor Heinze a remarca.
