Crisis den Gobierno di Bonaire
KRALENDIJK: Riba Diamars anochi, coalicion di gobierno di Bonaire a perde sosten, pues automaticamente esaki a cay.
Esaki a sosode despues cu miembro di Eilandsraad, Salma Serberie, a entrega su carta di retiro.
Cu esaki Serberie ta bandona e fraccion di Partido Demokratiko Boneriano (PDB), e partido mas grandi di coalicion.
Serberie no ta sostene e coalicion mas, door di cual nan no ta bay tin e mayoria mas. Diaranson atardi, Gezaghebber John Soliano a confirma den carta manda pa tur miembro di Conseho Insular cu e coalicion no tin mayoria mas. Gezaghebber a indica cu riba Diaranson 20 di Januari, Salma Serberie a manda notifica via carta na president di Conseho Insular cu e no ta conecta mas cu e fraccion di Partido PDB, pero lo keda mantene su asiento. Despues via email mesun dia, el a manda aclarea cu e ta retira su sosten tambe na coalicion.
E gobierno di Boneiro ta consisti di PDB, M21 y Cyrill Vrolijk, kende ta independiente den Conseho Insular.
Den e fraccion di PDB ultimo tempo tabata tin basta tension. “E decisionnan tuma recientemente y e direccion den cual e faccion ta bayendo no ta cuadra mas cu mi pensamentonan, balornan y e manera con mi kier eherce mi responsabilidad como representante di pueblo”, Serberie a skirbi den su carta di retiro.
Esnan di Partido PDB a indica cu nan ta sorprendi y cu pa nan ta desconoci e motibonan di Salba Serberie pa cu su retiro.
Gezaghebber den su carta a splica cu tin algun asunto social urgente ta wordo atendi, y cu nan ta exigi atencion continuo di e gobernantenan. Den algun caso, tin acuerdonan gubernamental haci cu Gobierno di Reino pa sigui cu cierto asunto. Ademas tin algun caso cu tin deadline ta acercando, y cu ta importante pa nan wordo trata debi cu nan ta di interes social, y cu tin di cumpli cu deadline pa asina e casonan por sigui.
Gezaghebber a skirbi cu debi cu Serberie a kibra di fraccion di PDB, y a retira su sosten na coalicion, no ta hopi cla ainda kico e consecuencianan tin pa maneho di Gobierno. Mirando e situacion nobo aki y e responsabilidad di Conseho Insular pa dicidi con ta sigui, el a haci un suplica pa Conseho Insular atende ainda e casonan urgente y andando, pa por percura lo mas pronto posibel e stabilidad y continuidad di maneho.
