Portuguesnan na Aruba ta celebra 60 aña di 'Dia di Portugal, Dia di Luis Vas de Camoes y dia di Comunidad Portugues

ORANJESTAD (AAN):  Dia 10 di Juni, ta dia cu ta conmemora e fayecimento di Luis Vaz de Camões for di aña 1580,

Luis ta considera e poeta mas grandi den e idioma portugues, autor di e poema ‘Os Lusíadas’. 10 di juni, tambe ta e Dia Nacional di Portugal, caminda ta celebra identidad, cultura y historia di pueblo portugues.

            Desde aña 1978, a bira un tradicion cu riba e fecha aki tambe ta celebra/recorda Dia di comunidadnan Portugues rond di mundo, pa honra emigrantenan y nan contribucion.

            E aña aki ya caba comunidad portugues ta celebra 60 aña na Aruba. Ta recorda cu na aña 1965 Sr. Aventura Quimarais a tuma e iniciativa pa e tempo ey celebra dia di Portugal conhuntamente cu un grupo di portuguesnan na Aruba.

            E celebracion a inicia cu un marcha cu a sali for di cas di Sr. Aventura situa na Wilhelminastraat (net dilanti Elmar) pa Wilhelmina Park.

            E grupo di portuguesnan aki den un forma hopi emocional a bini hunto pa’sina gradici e comunidad arubano pa e bon aceptacion di e portuguesnan aki na Aruba.

            Durante decadanan ‘50 y ‘60, hopi portugues, cual mayoria a bin for di Madeira, un isla na zuidwest di Portugal. Nan a yega Aruba buscando un bida miho pa nan famia. Aruba, den es tempo ey, tabata un isla cu hopi oportunidad, specialmente den industria petrolero.

            Na Madeira tabatin hopi pobresa, falta di trabou y un bida di campo dificil. E situacion economico a forsa hopi famia pa busca un miho futuro dor di sali for di nan pais natal. Aruba, cu e presencia di Lago Oil Refinery na San Nicolas, e tabata un destinacion atractivo cu bon oportunidad pa migrantenan.

            E portuguesnan a yega Aruba y a traha hopi duro, principalmente den Lago Oil Refinery, constuccion, trabou agricola (horticultura, hardineria), Panaderia, refresqueria y otro negoshinan chikito.

            Nan a traha den condicionnan duru, pero cu perseverancia, nan a logra yega na nan mesun cas, trese famianan y lanta un comunidad fuerte y trankil.

            E portuguesnan a keda uni rond di nan famia, iglesia catolico y tradicionnan Madeirense. Nan a crea un comunidad cu balornan fuerte di trabou duro, humildad y union familiar.

            Nan a sigui pasa nan idioma y custumber na nan yiunan. asina ey hopi yiu a crece bilingual, papiamento y portugues.

            E comunidad portugues a aporta hopi door di obra cu masha lealtad y cu trabao duro, nan contribucion tawata enorme den e desaroyo urbano y economico di Aruba.

            E rikesa di cultura y tradicion a trece un lazo estrecho di respet entre portugues y arubiano.

Hopi yiu di inmigrantenan portugues a logra studia y bira profesionalnan, negociante y lidernan

den e comunidad Arubano.

            Awendia, hopi di e famianan portugues di e epoca aki ya ta Arubiano, pero nan raiznan portugues ta keda bibo den e tradicion, e idioma y memoria di cada un. Hopi ta esnan cu ta forma parti di esaki y cu ta aporta di forma integral na e historia di Aruba. Dia di Portugal ta un momento pa honra e contribucion di nos comunidad portugues na e Isla caluroso aki di Aruba.

            Un legado. Nan sucesornan cu a transmiti forsa y tradicion no ta pasa pa historia zomaar, e ta pa nos: Un inspiracion. Nos ta recorda tur e trabao duro y esfuerso incansabel cu e Portuguesnan a dedica na Aruba y tambe tur e tradicion nan cu a siña nos biba humilde , biba cu honestidad, tene e cultura y tradicionnan bibo di nos antepasadonam,

            E generacion Luso Arubano Portugues tin e deber di sigui mantene e tradicionnan cu forsa y union, esaki ta e lema di e aña aki pa nos na Aruba. Semper uni cu otro y no laga nos tradicionnan afor, celebra cultura Portugues Madeirense.

            Sea un luso-arubano y carg’e ta un honor: carga den bo, e poema di Camões y e balor di Papiamento; sinti bo na cas na tur dos luga, cu tur dos idioma, cu tur dos bandera, pero cu un curason so!

Pa tur luso-arubano: boso ta e brug entre Portugal y Aruba — boso cu ta sucesornan bibo di forsa, tradicion y amor di esnan cu a laganos cu un herencia Luso-Madeirense, un herencia incomparabel y sin igual. 

Invitacion General pa Aruba, Comunidad Portuges y Luso Arubano

Diamars 10 di Juni 2025

Acto Protocolario DIA NACIONAL DI PORTUGAL Wilhelmina Park

4:30 pm – 6:30pm

Diasabra 14 di Juni 2025 FIESTA CULTURAL

Club Primavera 7:00pm

ENTRADA TA GRATIS!

Un Anochi di Musica, Baile y Tradicion Musica y baile tradicional portugues, cu artista invita for di Corsou – Antonio y su Amigonan Band, cu ta trece e ritmo di musica regional popular di Portugal, Grupo Folklorico Primavera, cu banda musical hubenil y infantil, presentacion di canto y poesia, sorpresa di Grupo di Baile cu lo trece bek den tempo cu ritmo y emocion.