Minister di Husticia a asisti na conferencia Halt di Reclassering

ORANJESTAD (AAN): Diahuebs mainta, Minister di Husticia, mr. drs. Arthur Dowers, a asisti na un conferencia importante organisa pa Stichting Reclassering y Jeugdbescherming Aruba,

riba e programa Halt. E conferencia tabata enfoca riba e esfuerso pa duna hobennan cu a comete un delito leve y cu a bin den contacto cu polis, un oportunidad di coregi nan actonan sin pasa pa proceso penal.

   Halt ta un trayecto destina pa hoben entre 12 te 17 aña cu ta brinda intervencion preventivo y formativo, pafo di e sistema penal, pa evita ripiticion di e comportacion criminal. Halt ta traha a base di rapidez y adapta segun e caso, e delito cometi, e circunstancia, y e hoben mes.

   Minister Dowers a pone enfasis riba e importancia di un enfoke preventivo y educativo den nos sistema di husticia hubenil. Gobierno ta kere den e poder di prevencion y Halt ta duna nos hobennan un segundo oportunidad sin pone nan den un caminda cu por afecta nan futuro. E ta un instrumento crucial pa proteha nos comunidad y guia nos hubentud na un direccion positivo.

   Pa un hoben por forma parti den e trayecto Halt, tanto e como su mayornan mester duna consentimento. No tur delito leve ta cualifica pa Halt, y un hoben no por pasa e trayecto Halt mas cu tres biaha y tin un limite di un solo biaha pa delito specifico. Si no haya acceso na Halt, e proceso lo continua segun e procedura legal tradicional.

   E intervencion Halt ta inclui diferente actividad, segun e necesidad di e hoben y relaciona cu e delito cometi. Esaki por constisti di sesion educativo, di combersacion y trabao social boluntario. E trayecto por dura te cu 20 ora, reparti riba un periodo di mas o menos cuatro luna.

   Un di e beneficio mas importante di Halt ta cu e hoben no ta haya un record penal. Mas ainda, Halt ta sirbi como un medio pa detecta problema trempan y referi e hoben na ayudo mas specialisa si ta necesario. Di e forma ey, Halt ta yuda preveni cu e hoben ta bolbe comete otro delito, cu hopi biaha sa ta mas pisa.

   Ministerio di Husticia ta compromete pa sigui fortalece colaboracion cu Stichting Reclassering y Jeugdbescherming Aruba y a amplia e uzo di e trayecto Halt como un medio di prevencion y rehabilitacion den e lucha contra delincuencia hubenil.