Departamento di Cultura Aruba – Proyecto San Juan – Dera Gay 2025:
ORANJESTAD (AAN): Den cuadro di e celebracion tradicional di San Juan – Dera Gay 2025, Departamento di Cultura Aruba, via su Seccion Implementacion, a desaroya un proyecto educativo amplio cu un enfoke special riba conscientizacion cultural na scolnan basico. E idea principal di e proyecto ta pa sembra un base di consciencia, creatividad y sosten cultural den nos comunidad, pa nos por cosecha un futuro cu orguyo, conocimento y respet pa nos tera. E proyecto aki a capta atencion di nos muchanan di scol y e interes pa mas conocimento y practica plantacion a resulta grandi. Asina nos ta alcansa nos meta cual ta sembra pa nos por cosecha conocimento y tradicion.
Material educativo y entrega na scolnan
Un total di 40 scol basico na Aruba a ricibi un pakete educativo cu contenido cu ta honra nos herencia cultural. E paketenan a inclui: wega nobo produci pa DCA, Wega di San Juan – Dera Gay, paki di simianan pa planta y material educativo ilustrativo riba e tradicion di celebracion di San Juan.
Ademas, 5 scol a expresa e deseo pa ricibi un baki grandi cu tera y gordura pa plantacion. Departamento di Cultura Aruba, danki na e cooperacion di Santa Rosa, a suministra e scolnan cu esaki pa asina yudanan cu nan plantacion. Tin cu menciona cu un gran cantidad di scol a pidi simia adicional pa planta den tereno di scol, reflehando e entusiasmo y interes riba e tematica.
Produccion di video educativo – Bentana Cultural
Pa fortifica e aspecto educativo, Departamento di Cultura Aruba a produci tres video educativo bou di e plataforma Bentana Cultural, specificamente dedica na e celebracion di San Juan - Dera Gay. Esaki a wordo pasa den noticia di Telearuba den un seccion nobo tocante cultura cu tin e nomber “Bentana Cultural”. Nos ta gradici Telearuba pa nan compromiso y sosten continuo. E tres episodionan ta disponible via YouTube di Departamento di Cultura Aruba:
Bentana Cultural – Celebracion Cultural – Dera Gay, Episodio 1, Episodio 2 y Episodio 3.
Material digital y trafico online
Adicionalmente, e material educativo, musicanan tradicional y weganan a wordo poni disponibel den forma digital riba nos website pa un y tur cu tin mester y por haci bon uzo di esaki. Nos por a nota cu durante e celebracion di San Juan, e trafico y bishitanan online tabata hopi activo, demostrando interes di e comunidad den e contenido cultural y educativo.
Un paso firme pa proteha nos herencia
Departamento di Cultura Aruba ta enfatisa cu bao auspicio di Ministerio di Cultura durante e añanan nos a traha structuralmente pa fortifica e conocimento di nos tradicion y fiesta cultural na scol. Pa aña 2025 a pone un enfoke particular riba e significado di San Juan como fiesta di cosecha, un aspecto di nos cultura cu ta confronta cu riesgo di desaparece. Nos kier stimula amor, aprecio y orguyo pa nos cunukero, nos sembramento y nos tradicion. Nos futuro ta den e man di nos yiu – y pa esey, nos ta inverti den educacion cultural cu contenido y acceso facil pa nos muchanan, cu ta e futuro generacion cu lo mester sigui carga nos tradicion y cultural pa añanan nos dilanti.
{gallery}Sembrando consciencia na scol pa por cosecha un futuro cu orguyo, conocimento y respet{/gallery}
